Дар меҳмонхонаи «Ҳаят Реҷенсӣ»-и шаҳри Душанбе Форуми байналмилалӣ оид ба кори иҷтимоӣ ва хизматрасониҳои иҷтимоӣ таҳти унвони «Кори иҷтимоӣ дар Тоҷикистон ва рушди он дар давраи истиқлолият» баргузор гардид.
Дар ҳамоиши дурӯза намояндагони мақомоти давлатӣ, олимон, роҳбарони соҳа ва шарикони рушд аз чанд кишвари ҷаҳон иштирок намуда, масъалаҳои рушди низоми ҳифзи иҷтимоӣ, ҳифзи ҳуқуқи кӯдакон, дастгирии оилаҳои осебпазир ва такмили хизматрасониҳои иҷтимоиро баррасӣ намуданд.
Форум бо ташаббуси Ҳукумати Ҷумҳурии Тоҷикистон тавассути Вазорати тандурустӣ ва ҳифзи иҷтимоии аҳолӣ ва бо дастгирии ЮНИСЕФ баргузор гардид.
Зимни ифтитоҳи форум таъкид гардид, ки Тоҷикистон дар самти ислоҳоти низоми ҳифзи иҷтимоӣ ва омода намудани мутахассисони соҳибихтисос ба пешрафтҳои назаррас ноил гардида, ҳамкории байнисоҳавиро барои расонидани хизматрасониҳои босифат ба кӯдакон ва гурӯҳҳои осебпазир тақвият медиҳад.
Дар доираи форум шаш нишасти мавзӯӣ баргузор шуда, масъалаҳои ҳамкории минтақавӣ, идоракунии ҳамгирошудаи парвандаҳо (кейс-менеҷмент), рақамикунонӣ ва омодасозии касбии кормандони иҷтимоӣ муҳокима шуд.
