Мардуми мо вожаи хубе дорад — шодишарик . Яъне аз барору комёбӣ, дастоварди дӯст, ҳамкор, хешу табор ё ҳамсоя хурсанд шудан. Моро низ чунин эҳсоси гуворо фаро гирифта, зеро журналисти шинохта, сардабири маҷаллаи “Даво” Бибихонум Дарвешзода, ки соле чанд чун сухангӯи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо касбияти баланд ифои вазифа карданд, акнун бо ҳамкоронашон 15-солагии нашрияро таҷлил мекунанд.
“Даво” дар миёни ҷумла нашрияҳои соҳаи тандурустӣ ягона маҷаллаи дараҷаи ҷумҳуриявист. Ва аз оғози нашр то имрӯз кормандони он бо дарки ҳамин масъулият кӯшиши муваффақона доранд, ки маҷалла симо, сабк, забон ва усули хоси ороиши худро дошта, ҳар шуморааш барои кулли ҳаводоронаш ҷолибу хонданӣ бошад.
Мундариҷаю муҳтавои “Даво” солҳои охир бо инъикоси мавзуъҳои муҳиму ҷолиби соҳаҳои мухталифи тиб дар перояи жанрҳои гуногуни журналистӣ писанди шумори ҳарчи бештари ҳам мутахассисон ва ҳам мардуми касбу кори гуногун мегардад.
Он ҳама комёбиҳои беназири тибби тоҷик ва табибон, ки дар 15 соли охир бинобар ғамхорию дастгирии доимии Ҳукумати кишвар дар кори ҳифзи солимии ҷомеа муваффақ гаштанд, пайваста инъикос мешуданд. Боиси хушнудист, ки қариб дар ҳар шумораи он аз фаъолияти серҷабҳаи Хадамот, дастоварду пешравиҳо, ҳамчунин масоили ҳалталаби мавҷудаи сохтор хабару мақолаю мусоҳибаҳоинтишор меёбанд.
Ҳайати эҷодӣ ва ҳаводорони сершумори “Даво”- ро бо солгарди хуҷаста табрику таҳният мегӯям. Барояшон тани бедарду рӯзгори хушукомёбиҳои эҷодӣ таманно дорам, то ки минбаъд ҳам “Даво” бо каломи муассиру давобахши худ ёвари табибон бошад.
Султон Бекмуродзода,
Сардори Хадамоти назорати давлатии тандурустӣ ва ҳифзи иҷтимоии аҳолӣ
