Фотодерматит чист?
Фотодерматит – маънои худи ин калима мафҳуми бемориро мефаҳмонад. Фото – офтоб, дерматит – илтиҳоби пӯст. Яъне илтиҳоби пӯст аз таъсири нурҳои офтоб. Ин беморӣ дар қисматҳои кушодаи пӯст (рӯй, гардан, қисми болоии қафаси сина ва пӯсти банди дастон) рух медиҳад. Он ҷойҳое, ки кушода мебошанд ва нурҳои офтоб ба ин қисматҳои пӯст мерасад. Агар бемор куртаҳои остинкўтоҳ ва ё майкаро истифода бурда бошад, беморӣ боз дар қисмати бозуҳо ва болои шонаҳо низ рух доданаш мумкин. Ин беморӣ дар шахсоне, ки ҳассосияти пўсти баданашон нисбати нурҳои ултробунафш хело баланд аст ва дар байни шахсоне, ки сафедпӯст мебошанд, ба вуљуд меояд. Беморӣ бештар ҳангоми бисёр истодан дар фазои кушоди офтобӣ пайдо мешавад. Ҳамчунин ин беморӣ метавонад баъди истифодабарии нурҳои ултрабунафш (УФО) дар ҳуҷраҳои физиотерапевтӣ низ пайдо шавад. Дар лаҳзаҳои аввали истодан дар фазои кушоди офтобӣ ё истифодабарии нурҳои ултробунафш дар ҳуҷраҳои физиотерапевтӣ сурхии пӯст ва варам пайдо мешавад. Қисмати пўсти ин мавзеъҳои бадан сӯзиш, дард ва хориш мекунад. Баъди ду-се рӯз варамӣ ва сурхии пӯст мегардад ва дар ин мавзеъҳо пўстпартоии тунук ба назар мерасанд. Ин беморӣ метавонад дертар пас аз як муддати муайян низ пайдо гардад. Ҳолати беморӣ аз миќдори зери нурҳои офтоб истодани шахс вобастагӣ дорад. Дар ин ҳолатҳо обилачаҳои зиёд, сурхии баланд ва варам ба назар мерасанд. Обилачаҳо метавонанд якҷо шуда, обилаҳои калонро ба вуҷуд оваранд. Ҳолатҳои сустшавиии организм ва баландшавии таби бадан мушоҳида шуданаш мумкин. Бемор дарди сахт, сӯзиш, хориш, гармшавиии бадан ва нороҳатиро эҳсос мекунад. Пас аз он, ки обилаҳо мекафанд, варамии пӯст ва сурхии пӯст нест мешавад. Дар ин мавзеъҳо пӯстпартоӣ ва доғҳо низ пайдо мешаванд. Агар ин беморӣ тез-тез рух додан гирад, ба бемории илтиҳоби музмини пӯст аз нурҳои офтобӣ бурда мерасонад. Дар ин ҳолат пӯсти ин мавзеъҳои бадан хушк мешавад, сахт мегардад, расмҳои пӯст (кожный рисунок) аён мегардад. Инчунин боиси пайдо гаштани доғҳои хунин мешавад. Рагҳои майдаи хунгарди ин мавзеъҳо аёнтар мешаванд. Ҳолатҳое мешавад, ки фотодерматит ба бемории экзема мубадал гардад.
Табобати беморӣ: Ба худтабобат ва ба тавсияи шахсоне, ки мутахассиси соҳа (духтурони пуст) нестанд, роҳ надиҳед. Ҳатман ба мутахассис-духтуроне, ки ба муоина ва табобати бемориҳои пӯст машғул мебошанд, муроҷиат намоед. Таҳти тавсия ва назорати мутахассис табобатро ба анҷом расонидан лозим аст.
Пешгирии беморӣ: Тавсияро аввалан ба он шахсоне медиҳем, ки сафедпўстанд, ин гуна одамон дар фазои кушоди офтобӣ сайругашт накунанд. Ва ба ҳамаи он шахсоне, ки ҳассосияти пӯсти баданашон нисбати нурҳои ултробунафши офтобӣ баланд мебошанд, маслиҳат медиҳем, ки аз кремҳои зиддиофтобии маркаҳои SPF аз 50-60 баландро истифода баранд, зеро ин кремҳо қабатеро дар рӯи пўст ба вуҷуд меоваранд, ки нурҳои ултрабунафши офтобӣ аз он гузашта наметавонанд.
Бояд қайд кард, ки ҳар як шахс ба саломатии худ эътибори ҷиддӣ диҳад. Ваќте ба ягон беморӣ мубтало мешавад, ҳатман ба мутахассиси соҳа муроҷиат намояд, то ин ки ба оқибатҳои ногувори беморӣ дучор наояд.
