Сиёҳии зери чашмон ҳусни касро коста намуда, аз он шаҳодат медиҳад, ки норасоие дар организм ба вуҷуд омадааст. Ба ақидае халтачаҳои зери чашм дар натиҷаи мондашавӣ ё камхобист, вале боз як қатор омилҳост, ки метавонанд ба пайдошавии халтачаҳои зери чашм сабаб шаванд.
Аз нигоҳи тиб халтачаҳои зери чашм ҳеҷ хатар надоранд. Онҳо метавонанд дар инсонҳо дар натиҷаи ранг гирифтани бофтаи организми зинда ба амал оянд, вале эҳтимол дорад, ки нишонаи зиёдии об дар организмро низ нишон диҳанд. Инчунин, халтачаҳои зери чашм шаҳодати он аст, ки мушкилоте дар гурда ё мубодилаи моддаҳои ғайриорганикӣ, ҳатто камхунӣ мавҷуд аст. Агар мушоҳида кардед, ки халтачаҳои зери чашм танҳо дар фасли баҳор пайдо мешаванд, пас мумкин аст, ки ҳассосият аз чанг дошта бошед.
Чӣ тавр аз халтачаҳои зери чашм метавон халос шуд?
Ғайр аз малҳамҳои табиии гуногун, ки барои аз байн бурдани халтачаҳои зери чашм кўмак менамоянд, мо ба шумо якчанд воситаҳои халқиро низ пешниҳод менамоем.
БОДИРИНГ
Аз ин васила бибиҳои мо истифода мебурданд. Бодиринги хунукро гирдшакл бурида, ба чашм ва халтачаҳои зери чашм гузошта, муддати 15 дақиқа нигоҳ доред.
КАРТОШКА
Ин усул ҳам ба василаи пештара монанд аст. Картошкаи хунук бар зидди омос кўмак мерасонад. Картошкаро шабона ба яхдон гузоред, баъдан шуста, ба қисмҳо тақсим намуда, ба болои чашм муддати 5- 10 дақиқа нигоҳ доред. Баъд аз ин бо оби ширгарм чашматонро шўед.
ШИР
Пораи матоъро ба шири хунук тар карда, каме ҷафида, ба чашм гузоред ва муддати 15-20 дақиқа нигоҳ доред. Ин усул бо шамолхўрӣ ва варам мубориза мебарад.
ХАЛТАЧАҲОИ ЧОЙ
Халтачаи чойро ба оби гарм тар намуда, баъдан ба яхдон муддати 5-10 дақиқа гузоред. Аз яхдон гирифта, ба чашмон муддати 20-25 дақиқа гузоред. Халтачаи чойи кабуд ё бобуна бошад, беҳтар аст.
САФЕДАИ ТУХМ
Сафедии тухмро ба зери чашм бо шоткача молед. То хушк шуданаш, ба муддати 20 дақиқа нигоҳ доред. Пасон бо оби хунук шўед.
ЯХ
Ин усулро дар он ҳолате бояд истифода бурд, ки шумо мехоҳед фавран аз халтачаҳои зери чашмон халос шавед. Бо ҳаракатҳои маҳсмонанд бо яхпораҳо метавон муддати панҷ дақиқа аз халтачаҳои зери чашмон раҳоӣ ёфт, аммо ин усул метавонад ба чашмон хатаровар бошад.
Маслиҳатҳои иловагӣ
Пас аз он ки шумо аз халтачаҳои зери чашмонатон халос шудед, боварӣ ҳосил намоед, ки онҳо дигар пайдо намешаванд. Барои ин бис- ёртар хоб рафта, вақти холии худ-ро ба тамошои оинаи нилгун сарф накунед. Гирдҳои сиёҳтоб дар зери чашмон аз норасоии витаминҳои К ва В12 пайдо мешаванд. Аз ин рў, хўроки солим ва кабудию мевагӣ бештар истеъмол намоед. Инчунин, хўрдани намакро кам намоед, чунки намак обро дар организм нигоҳ медорад.
Ғайр аз ин, обро зиёд истеъмол намоед, вале на пеш аз хоб. Ҳамчунин, яке аз сабабҳои пайдоиши халтачаҳои зери чашм ин сигоркашӣ мебошад, ки фавран аз он даст кашид.
Фароҳамсоз Мадина
