Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тасмим дорад дар шаҳри Душанбе Донишгоҳи байналмилалии минтақавии тандурустӣ таъсис диҳад. Дар ин робита Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо директори минтақавии Осиёи Марказӣ ва Ғарбии Раёсати рушди захираҳои инсонӣ ва иҷтимоии Бонки Осиёии Рушд София Шакил мулоқот ва гуфтушунид анҷом дод.
Зимни вохӯрӣ ҷонибҳо масъалаҳои муҳими соҳаи тандурустӣ, аз ҷумла таъсиси Беморхонаи миллии кӯдакона, таҳияи Шабакаи озмоишгоҳҳои минтақавӣ оид ба муқовимати зиддимикробӣ, инчунин сохтмон ва бо дастгоҳу лавозимоти муосири тиббӣ муҷаҳҳаз намудани Маркази миллии онкологиро мавриди баррасӣ қарор доданд. Ҳамзамон, доир ба дурнамои рушди ҳамкориҳои Тоҷикистон ва Бонки Осиёии Рушд дар самти такмили инфрасохтори тандурустӣ, баланд бардоштани сифати хизматрасонии тиббӣ ва рушди захираҳои инсонӣ табодули афкор сурат гирифт.
Намояндагони Бонки Осиёии Рушд барои густариши ҳамкориҳо ва дастгирии иқдомоту нақшаҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон изҳори ҳавасмандӣ намуданд.
Ҷамолиддин Абдуллозода таъкид кард, ки Бонки Осиёии Рушд яке аз шарикони асосии Ҷумҳурии Тоҷикистон дар соҳаи тандурустӣ ба ҳисоб меравад. Ба гуфтаи ӯ, татбиқи лоиҳаҳои сармоягузорӣ, аз ҷумла амалисозии лоиҳаи «Хизматрасониҳои маҷмуӣ барои модар ва кӯдак», дар баланд бардоштани сатҳ ва сифати хизматрасонии тиббӣ нақши муассир дорад. Ҷонибҳо омодагии худро барои идомаи ҳамкориҳои судманд ва татбиқи ташаббусҳои муштарак дар самти рушди соҳаи тандурустӣ баён намуданд.
