Тибқи тадқиқоту омори мавҷуда маргу мири одамон аз бемориҳои музмини шуш дар ҷаҳон дар ҷойи чорум қарор дорад. Дар кишвари мо низ теъдоди мубталоёни он, мутаассифона, кам нест.
— Ин беморӣ аз зумраи бемориҳои паҳнгаштаи шуш буда, онро бронхити музмин низ мегӯянд. Дар бемор нишонаҳои тез-тез сулфа кардан, нафаскашии ҳуштакдор ва дамкӯтаҳию мондашавӣ дида мешавад. Аслан, гирифторони ин беморӣ аз боду ҳавои чанголуд ва дуди тамоку азият кашида, худро нороҳат ҳис мекунанд, — мегӯяд табиб — аллерголог Гавҳар Ҳаётова.
Баъзан бо ин нишонаҳо аҳволи бемор якбора вазнин шуда, одатан он чанд рӯз давом меёбад ва табобати дурударозро тақозо мекунад.
Табиб иброз медорад, ки аксари беморон бо фарорасии фасли тирамоҳ ва то анҷоми мавсими баҳор, асосан, аз нишонаҳои бемориҳои аллергикӣ ва илтиҳоби роҳҳои нафас шикоят мекунанд.
— Фасли сармо давраест, ки бемориҳои шадиди роҳҳои нафас хурӯҷ намуда, одамон аз чангу гард ва сармохурӣ мубталои бемориҳои роҳҳои нафас мегарданд. Аксари онҳо нишонаҳои бемориҳои шадиди роҳҳои нафасро аз аллергия фарқ карда наметавонанд. Аз ин рӯ, антибиотикҳоро истифода мебаранд. Бехабар аз он ки барои нафарони ба антибиотикҳо ҳассос истеъмоли он оқибати ногувор дошта, ҳолаташонро якбора вазнин мекунад. Таъкид менамоям, ки аз антибиотикҳо танҳо бо маслиҳати табиб бояд истифода бурд.
Воқеан, байни бемориҳои аллергикӣ ва роҳҳои нафас тафовути ҷиддӣ вуҷуд надорад. Хориши гулӯ, сулфа ва тез — тез атса задан нишонаҳои бемориҳои аллергикӣ низ мебошад. Фарқият танҳо дар он аст, ки зимни маризиҳои роҳҳои нафас ҳарорати бадан баланд мешавад, — шарҳ медиҳад Гавҳар Ҳаётова.
Гавҳар Ҳаётова ҳамчунин изҳор медорад, ки сари вақт ба табобат фаро нагирифтани гирифторони бемориҳои шадиди роҳҳои нафас ва шамолкашӣ хатари гирифторшавӣ ба маризии илтиҳоби шушро дар онҳо ба вуҷуд меорад. Ҳамчунин, беаҳамиятӣ ба маризиҳои аллергикӣ боиси мубтало гардидан ба бемориҳои асматикӣ мешавад, ки табобати он муддати дурудароз идома меёбад.
— Ҳангоми гирифторшавӣ ба бемориҳои роҳҳои нафас дар баробари истеъмоли дорувориҳо беморон аз маҳлулҳои махсус барои ингалятсия истифода мекунанд. Имрӯз, ки пешрафти технология дар ҳама соҳаҳо мушоҳида мешавад, дар соҳаи тиб низ рушди технологияи муосир чашмрас аст.
Небулайзер яке аз таҷҳизоти ихтироъшудаи замони муосир мебошад. Он чанд соли охир аст, ки барои беморони роҳҳои нафас чун ёрии аввалин ба таври васеъ истифода мегардад.
Тавассути небулайзер бемор маҳлули тавсияшударо нафас мекашад, ки ҳолаташро беҳ месозад.
Бояд гуфт, ки Небузайлерро на танҳо дар мавриди беморӣ, инчунин барои пешгирӣ аз маризиҳои роҳҳои нафас низ метавон истифода кард. Масалан, онҳое, ки нафастангӣ доранд, бо ин асбоб аз маҳлули небутамон истифода менамоянд. Дар шароити хона низ небулайзерро метавон истифода бурд. Ба шарте, ки маҳлулро табиб тавсия дода бошад, — мегӯяд табиб Гавҳар Ҳаётова.
Паймонаи Ҷовидон,
«Даво»
