Баҳорону тобистон ташвиши онҳое, ки аллергия доранд, зиёд мегардад.
Дар ин шумора хостем ба хонандагони маҷалла, якчанд маслиҳати санҷидашударо пешкаш намоем:
- Агар дар хонаатон гули каланхое парвариш мекарда бошед, аз баргҳои тару тозаи он обашро ҷафида гиреду рўзе якчанд маротиба пардаҳои луобии биниатонро чайқонед.
- Аз хўрдани намак, шакар, оҳар (крахмал) ва маҳсулоте, ки намаку оҳари зиёд дорад, худдорӣ карда, меваҷоту сабзавоти тару тозаро бештар истеъмол намоед. Аммо дар назар доред, ки қулфинай, афлесун ва банану шафтолу аллергияро ба хурўҷ оварда метавонанд.
- Дар давоми як моҳ маҳлули хори сагак (череда)-ро чун чой дам карда, ним истаконӣ нўшед. Ранги маҳлул бояд тиллоӣ шавад, агар рангаш тира ё зард гардад, маълум, ки он ба истифода мувофиқ нест. Онро пас аз тайёр кардан дарҳол нўшидан лозим.
- Яке аз воситаҳои сахттаъсири табобати аллергия ин мумиё аст, ки як граммашро дар 1000 мл оби ширгарм таҳлил карда, рўзе як маротиба субҳ ба андозаи 100 мл менўшанд.
- Шарбат ё маҳлулоби решаи карафс низ воситаи хуби бартарафкунандаи аллергия шуда метавонад. Шарбати решаи тару тозаи ин гиёҳро рўзе 3 маротиба, 1-2 қошуқчагӣ 30 дақиқа қабл аз хўрокхўрӣ нўшед. Гиёҳобро ин тавр тайёр мекунанд: 2 қошуқ решаи гиёҳро дар як истакон оби хунук 2 соат нигоҳ дошта, аз дока гузаронеду ба се ҳисса тақсим карда, рўзе 3 маротиба нўшед.
- Агар аз маҳсулоти асалӣ аллергия надошта бошед, муми занбўри асалро хўред.
- Гиёҳи қоқуро шуста, аз гўштқиммакунак гузаронеду шарбаташро ҷафида, ба як истаконаш ду истакон об ҳамроҳ намоед ва дар оташи паст то ҷўшидан расонед. Рўзҳои дуюму сеюм якқошуқӣ саҳару бегоҳ 20 дақиқа пеш аз хўрокхўрӣ нўшед. Рўзҳои дигар таъсирашро ба ҷисматон дида, то 3- 4 қошуқӣ нўшидани онро давом диҳед. Давраи табобат 1,5 моҳ.
Таҳияи Ҳ. Ҳусния
