Собиқадори соҳаи дорусозӣ, дастпарвари факултаи дорусозии Омўзишгоҳи тиббии шаҳри Сталинобод (имрўза Донишкадаи тиббии Тоҷикистон) Олимҷон Шамсиддинов фаъолияти меҳнатиашро дар соҳа аз соли 1964 дар Идораи дорухонаҳои вилояти Суғд оғоз намудааст.
Соли 1970 вай ба зодгоҳаш ноҳияи Ашт омада, то соли 1991 дар дорухонаи марказии ноҳия ба сифати провизор кор кард. Минбаъд дар дорухонаи №64 ноҳия, воқеъ дар деҳаи Понғоз, ки аз маркази ноҳия 15 км дур воқеъ аст, ба сифати мудир то ба имрўз фаъолият дорад.
Олимҷон Шамсиддинов, ки соли 2011 ба зиёрати Каъбатуллоҳ рафта, сазовори унвони «Ҳоҷӣ» гардидааст, меҳри касбашро дар дили фарзандону наберагонаш низ омўхтааст:
-Фарзанди калониам Айниддин хатмкардаи Донишкадаи тиббии Тоҷикистон буда, айни ҳол сардухтури Маркази саломатии деҳа аст,-мегўяд, Ҳоҷибобо,- ҳамсараш низ духтури оилавӣ буда, набераамон Саиднисо ҳамроҳи ман кор мекунад. Вай соли равон факултаи дорусозии Коллеҷи тиббии шаҳри Хуҷандро хатм кард.
-Чаро касби бобоятро интихоб кардӣ,- савол додем ба Саиднисо, ки дар посух гуфт:
-Ба фикрам дар дунё аз касби табибиву дорусозӣ дида беҳтар касбе нест, зеро ҳарду ҳам ба дарди одамон даво мебахшанд. Ноумедонро аз нав ба ҳаёт ва умри боқиашон умеду боварӣ мебахшанд.
Олимҷон Шамсиддинов барои хизматҳои шоистааш дар соҳаи дорусозӣ бо якчанд Ифтихорномаҳои соҳавӣ, аз ҷумла Вазорати тандурустии ҷумҳурӣ, МИҲД ноҳияи Ашт сарфароз гардонида шудааст.
-Зиёда аз 40 сол аст, ки дар ин соҳа заҳмат мекашед. Оё аз касби инти- хобкардаатон пушаймон нестед,- мепурсем аз қаҳрамони худ.
-Ҳаргиз. Бо ин касб тамоми фарзандонро соҳибмаълмот кардам. Якчанд шогирдам, аз ҷумла Тўйалӣ Дадобоев мудири дорухонаи ҷамоати «Дўстӣ», Ҳабиба Шамсиддинова дорусози дорухонаи ҷамоати деҳоти Шодоба ва дигаронро ба камол расонидам, ки аз ин ифтихор дорам. Муҳимтар аз ҳама, набераам Саиднисо паҳлўям истода нозукиҳои касби маро меомўзад. Яъне, ки бобою набера дорусозӣ мекунем. Хотирам ҷамъ аст, ки чароғи ҳунари ман минбаъд низ ҳамеша рўшан хоҳад буд.
М.Маҳмудов.
