Ҳар ноҳия дар даврони соҳибистиқлолӣ аввалин ташкилкунандагони ин ё он соҳаро дар сохтори хусусӣ дорад. Дар ноҳияи Данғара Хуршед Саъдуллоев аз ҷумлаи аввалин ташкилкунандагони дорухонаҳои шахсӣ ба ҳисоб меравад. Ў сардори ҶДММ «Хуршед» — и ноҳияи Данғара мебошад. Хуршед соли 1977 факултаи фармасевтии омўзишгоҳи тиббии шаҳри Кўлобро хатм карда, мувофиқи роҳхат ба дорухонаи марказии ноҳияи Данғара ба кор фиристода мешавад.
Соли ба кор омадани ман 15-16 нафар дар дорухонаи марказии ноҳияи Данғара кор мекарданд,- он солҳоро ба ёд оварда нақл кард ў. Мо дар даврони Шўравӣ дар дорухона ба дорутайёркунӣ машғул будем, на мисли имрўз, ки доруфурўшӣ кунем. Баъди ду соли кор \солҳои 1979-1981\ ба хизмати Армияи Шўравӣ даъват шудам. Дар сафҳои артиши шўравӣ дар госпитали ҳарбӣ ба ҳайси бародари шавқат кор кардам. Соли 1981 баъди хизмати аскарӣ дар дорухонаи рақами 53 корамро давом додам. Соли 1982 ба вазифаи ҷонишини директори дорухонаи рақами 53 таъин шудам. То соли 1990 дар вазифаи ҷонишини мудири дорухона кор карда, ҳамчун мудири дорухонаи 0450 то соли 1996 кор кардам. Бо сабаби барҳам хўрдан ва хусусӣ шудани дорухонаҳои давлатӣ соли 2010 ҶДММ «Хуршед»-ро таъсис дода, дар назди он дорухонаи шахсии худро ташкил додам. Он замон дар маркази ноҳияи Данғара ҳамагӣ ду дорухона буд. Яке аз онҳо дорухонаи мо ва дуюмаш дорухонаи марказии ноҳия буд. Бо мурури замон ва солҳои дигар дорухонаҳои дигари хусусӣ зиёд шудан гирифтанд, — илова кард Хуршед Саъдуллоев .
Дар ҳисоби ҶДММ «Хуршед» ду дорухона мебошад ва 5 нафар дар онҳо кор мекунанд. Бо беморхонаи марказии ноҳия ҳамкорӣ доранд. Аз фарзандон Рустам Саъдуллоев факултаи фармасевтиро хатм карда, дар дорухонаи худашон кор мекунад. Доруҳоро бошанд, онҳо худашон меоранд ва дар баъзе ҳолатҳо аз ҶДММ «Сомон фарм» -и шаҳри Қурғонтеппа мегиранд.
Билоли Шамс, аз ноҳияи Данғара
