Дар тӯли 15 сол маҷаллаи «Даво» ҳамчун минбари боэътимоди иттилоотӣ дар соҳаи
тандурустӣ ва дорусозӣ фаъолият намуда, дар баланд бардоштани маърифати тиббии ҷомеа, таблиғи тарзи ҳаёти солим ва дастгирии мутахассисони соҳа саҳми арзанда гузоштааст. Матолиби пурмуҳтаво, таҳлили касбӣ ва мавқеи устувори маҷалла боиси эҳтиром ва эътимоди хонандагон гардидааст.
Таъсиси маҷаллаи «Даво» марҳилаи муҳим дар рушди журналистикаи соҳавӣ ва таблиғи донишҳои тиббӣ дар Ҷумҳурии Тоҷикистон ба шумор меравад. Идеяи таъсиси ин маҷалла дар даврае ба миён омад, ки ҷомеа беш аз ҳар вақти дигар ба манбаи боэътимод, касбӣ ва дастрас оид ба масъалаҳои тандурустӣ, дорусозӣ ва тарзи ҳаёти солим ниёз дошт.
Солҳои аввали фаъолият барои ҳайати эҷодӣ осон набуданд. Бо вуҷуди маҳдуд будани имкониятҳои молиявӣ ва техникии он давра, муассисон ва рӯзноманигорон бо ҳисси баланди масъулият ва муҳаббат ба касб фаъолияти худро оғоз намуданд. Ҳар шумораи маҷалла натиҷаи заҳмати зиёд, ҷустуҷӯ ва ҳамкории зич бо табибон, олимон ва мутахассисони соҳа буд.
«Даво» аз рӯзҳои аввал ҳадаф гузошт, ки миёни илм ва ҷомеа пули боэътимод гардад. Дар саҳифаҳои он на танҳо мақолаҳои илмӣ, балки маводи фаҳмо барои аҳолӣ васеъ, маслиҳатҳои муфид, мусоҳибаҳо бо табибон ва дорусозони варзида ва баррасии масъалаҳои мубрами соҳа ҷой мегирифтанд. Ин равиш боис гардид, ки маҷалла тадриҷан эътимод ва муҳаббати хонандагонро ба даст орад.
Бо гузашти солҳо маҷаллаи «Даво» рушд ёфта, доираи мавзӯъҳо ва хонандагони худро васеъ намуд. Имрӯз «Даво» на танҳо як нашрияи иттилоотӣ, балки як мактаби таҷриба, андеша ва маърифати тиббӣ ва фарматсевтӣ ба ҳисоб меравад.
Итминон дорем, ки маҷаллаи «Даво» минбаъд низ бо рӯҳияи баланди масъулиятшиносӣ фаъолияти худро идома дода, дар рушди соҳаи тандурустии кишвар нақши боз ҳам муассир хоҳад гузошт.
Ҳайати эҷодӣ ва роҳбарияти маҷаллаи «Даво» — ро ба муносибати 15-солагии таъсисёбӣ самимона табрик намуда, ба ҳар яки Шумо сиҳатмандӣ, комёбиҳои эҷодӣ ва дастовардҳои нав таманно менамоям.
Баҳодур Холназар,
Директори Озмоишгоҳи миллии референсӣ
