Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади натиҷагирӣ аз фаъолияти вазорат ва зерсохторҳои он дар нимсолаи аввали соли 2026 нишасти матбуотӣ баргузор шуд.
Зимни нишаст таъкид гардид, ки бо мақсади беҳтар намудани дастрасии аҳолӣ ба хизматрасониҳои босифати тиббӣ, дар давраи ҳисоботӣ бо иштироки бевоситаи Пешвои миллат, муҳтарам Эмомалӣ Раҳмон, зимни сафарҳои корӣ ба шаҳру ноҳияҳои кишвар як қатор иншооти нави тандурустӣ мавриди истифода қарор гирифтанд. Аз ҷумла, бинои иловагии Беморхонаи марказии ноҳияи Мастчоҳ, таваллудхона дар ҷамоати деҳоти Ворухи шаҳри Исфара ва Маркази ташхисию табобатии «Нейромед» дар шаҳри Хуҷанд ба истифода дода шуданд.
Иттилоъ дода шуд, ки дар шаш моҳи соли ҷорӣ дар соҳа дар маҷмӯъ 40 навгонӣ ҷорӣ гардидааст. Аз ин шумора 4 навгонӣ ба самти ташхис ва 36 навгонӣ ба самти табобат рост меояд.
Бино ба маълумоти оморӣ, дар нимсолаи аввали соли 2026 дар ҷумҳурӣ 121 ҳазору 810 кӯдак ба дунё омадааст, ки нисбат ба ҳамин давраи соли гузашта 1 ҳазору 137 нафар зиёд мебошад.
Ҳамзамон таъкид гардид, ки дар натиҷаи татбиқи чорабиниҳои пешгирикунанда, ташхисӣ ва маҳдудкунанда дар ин давра ҳолатҳои гирифторшавӣ ба бемориҳои сироятии махсусан хатарнок, аз ҷумла домана, вабо, тоун, табби хунин, ҳорӣ, фалаҷ ва лептоспироз ба қайд гирифта нашудааст.
Дар ин муддат мутахассисон 4 ҳазору 162 санҷиши санитарӣ ва эпидемиологӣ гузаронида, нисбат ба 5 ҳазору 734 нафар барои риоя накардани қоидаҳои санитарию эпидемиологӣ протоколҳои ҳуқуқвайронкунии маъмурӣ тартиб додаанд.
Айни замон дар муассисаҳои тандурустии мамлакат 22 ҳазору 763 нафар табиб ва 65 ҳазору 496 нафар корманди миёнаи тиббӣ фаъолият мекунанд. Ин нишондиҳанда нисбат ба соли гузашта мутаносибан 2,7 ва 2,6 фоиз афзоиш ёфтааст. Сатҳи таъмин будани воҳидҳои корӣ барои табибон 95,7 фоиз ва барои кормандони миёнаи тиббӣ 100 фоизро ташкил медиҳад.
Дар доираи аттестатсияи кадрҳои тиббӣ дар шаш моҳи соли ҷорӣ 1 ҳазору 142 нафар табиб ва 2 ҳазору 143 нафар корманди миёнаи тиббӣ аз аттестатсия гузаштанд.
Дар самти илм низ натиҷаҳои муайян ба даст омада, дар шӯроҳои диссертатсионии амалкунанда 36 рисолаи номзадӣ ва 4 рисолаи докторӣ ҳимоя шудааст.
Дар бахши фарматсевтӣ бошад, бо қарори Ҳукумати Ҷумҳурии Тоҷикистон Барномаи рушди саноати фарматсевтӣ барои солҳои 2026–2030 тасдиқ гардид, ки ба рушди истеҳсоли дорувории ватанӣ равона шудааст.
Ҳамчунин, дар давраи ҳисоботӣ ба муассисаҳои табобатию пешгирии ҷумҳурӣ ба маблағи умумии 36,8 миллион сомонӣ таҷҳизот ва лавозимоти тиббӣ дастрас карда шудааст.
Дар самти ҳифзи иҷтимоии аҳолӣ низ корҳои назаррас анҷом дода шуданд. То 1 июли соли 2026 ба 445 ҳазору 947 нафар шаҳрвандони осебпазир ва дар ҳолати душвори зиндагӣ қарор дошта кумак ва хизматҳои гуногуни иҷтимоӣ расонида шудааст.
Шумораи умумии хонаводаҳои камбизоат 234 ҳазору 590 ададро ташкил дода, маблағгузории кумакпулии унвонии иҷтимоӣ дар нимсолаи аввал ба 120 миллиону 373 ҳазору 617 сомонӣ расидааст, ки 92 фоизи нақшаи пешбинишударо дар бар мегирад.
Ба ҳолати 30 июни соли 2026 дар кишвар 172 ҳазору 394 нафар шахси маъюб ба қайд гирифта шудааст, ки 1,6 фоизи аҳолии ҷумҳуриро ташкил медиҳад.
Дар бахши беҳсозии инфрасохтори соҳаи тандурустӣ низ пешрафтҳо ба назар мерасанд. Дар шаш моҳи соли ҷорӣ аз ҳисоби ҳамаи сарчашмаҳо 46 муассисаи тандурустӣ сохта шуда, дар 95 муассисаи дигар корҳои сохтмонӣ идома доранд. Илова бар ин, 61 муассиса пурра таъмир гардида, дар 125 муассисаи дигар корҳои таъмиру азнавсозӣ идома доранд.
