Дар идомаи сафари корӣ ба шаҳру навоҳии вилояти Суғд Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳоти Унҷии ноҳияи Бобоҷон Ғафуров бинои нави маъмурии Маркази солимгардонии «Соҳили Унҷӣ»-ро мавриди истифода қарор доданд.
Марказ аз ҷониби соҳибкори маҳаллӣ Абдулло Абдуллоев бунёд шуда, дорои 50 ҳуҷра, 100 ҷойи хоб ва 30 ҷойи корӣ мебошад. Иншоот барои расонидани хизматрасонии босифати тиббӣ ва солимгардонӣ ба аҳолӣ пешбинӣ гардидааст.
Зимни боздид Сарвари давлат бо шароити фароҳамшуда, таҷҳизоти муосири тиббӣ ва сатҳи корҳои сохтмонӣ шинос шуда, ба фаъолияти марказ баҳои баланд доданд. Ҳамчунин, ташаббуси соҳибкорон дар самти рушди соҳаи тандурустӣ намунаи ибрат арзёбӣ гардид.
Дар марказ шуъбаҳои қабул, физиотерапия, бемориҳои асаб, занона ва дилу рагҳои хунгард фаъолият мекунанд. Хизматрасонӣ аз ҷониби мутахассисони соҳибтаҷриба мутобиқ ба талаботи муосир ба роҳ монда шудааст.
Саҳни марказ низ ободу сабзкорӣ гардида, барои истироҳату фароғати беморон нишастгоҳҳои замонавӣ муҳайё карда шудаанд.
Зимни суҳбат бо масъулон Президенти мамлакат таъкид намуданд, ки ҷалби сармояи хусусӣ ба соҳаи тандурустӣ аз самтҳои муҳими сиёсати иҷтимоии давлат буда, чунин ташаббусҳо барои беҳтар намудани хизматрасонии тиббӣ, таҳкими ҳифзи саломатии аҳолӣ ва таъсиси ҷойҳои нави корӣ мусоидат менамоянд.
Интизор меравад, ки Маркази солимгардонии «Соҳили Унҷӣ» минбаъд ба сокинони ноҳияи Бобоҷон Ғафуров ва минтақаҳои атроф хизмат расонида, дар рушди соҳаи тандурустӣ саҳми арзанда гузорад.
