Тобистон фасли пурфайзу бобаракат буда, дар он меваю сабзавоти гуногун пухта, зеби дастархон мешаванд. Бо маќсади ҳифзи саломатӣ ғизоҳое ҳастанд, ки дар тобистон нахўрданашон беҳтар аст, зеро хўрок бо таъсири гармии аз 30 дараҷа боло дар муддати кўтоҳ вайрон шуда, ба заҳр табдил меёбад. Алалхусус, ғизоҳои зерин тезвайроншаванда буда, дар фасли гармо худдорӣ аз онҳо беҳтар аст.
1.Хўришҳои майонездор
Мўҳлати нигоҳдории хўриш (салат)-ҳои майонездор набояд аз 6 соат зиёд бошад. Аммо дар ошхона ё тарабхона имкони санҷидани кай тайёр кардани хўриш мавҷуд нест. Ҳар ќадар сабзавоти хўришҳо хурдтар реза карда шуда бошад, ҳамон ќадар зудтар вайрон мешаванд. Духтурон муайян кардаанд, ки микробҳо ва чўбчаҳои сироятӣ дар маҳсулоти хушк, намакдор ва калон резашуда тез афзоиш карда наметавонанд.
Агар дилатон хўриши майонездор бикашад, беҳтараш дар хона тайёр намуда, тару тоза истеъмол кунед.
Кабоб (шашлик) ва мурғбирён
Баъзан аз сабаби зиёд будани мизоҷон кабоб то охир нопухта, нимхом ба табаќ гузошта мешавад. Хўроки нимхом метавонад сабаби заҳролудшавӣ гардад. Дар гармӣ кабоб ва мурғбирён баъди ду соати тайёр шудан ба вайроншавӣ сар мекунанд. Умуман, ғизои гўштдорро дар тобистон кам истеъмол кардан беҳтар аст.
3.Йогурт ва самбўсаву пирожки
Ҳар дуюмин кўдаке, ки тобистон гирифтори шикамрав мешавад, сабабаш истеъмоли йогурт ё дигар маҳсулоти зудвайроншаванда мебошад. Аз ин рў, чунин маҳсулотро дар хона тайёр кардану зуд истеъмол кардан беҳтар аст.
Зимни харидани яхмос низ эҳтиёт бояд шуд. Агар он обшуда ба назар намояд ё мўҳлати истеъмолаш маълум набошад, беҳтараш нахаред. Дар ҳавои гарм маҳсулоти ќаннодии кремдорро низ нахаред, зеро ин гуна маҳсулот низ дар гармӣ тез вайрон мешавад.
4.Тухмбирён
Тухм яке аз маҳсулоти зудвайроншаванда буда, метавонад боиси бемориҳои шадиди рўда шавад. Фаромўш накунед, ки пеш аз истеъмол тухмро бо оби гарм шустан лозим аст. Шумо аз куҷо медонед, ки дар ошхона, ќаҳвахона , тарабхона ин ќоидаро риоя кардаанд. Аз ин рў, агар дилатон тухмбирён кашад, худатон ќоидаҳои зикршударо риоя карда, дар хона тайёр намоед.
5.Моҳӣ
Моҳии мўҳлаташ гузашта яке аз хатарноктарин маҳсулоти ғизоӣ аст. Дар ин бобат моҳии баҳрӣ нисбат ба моҳии дарёӣ камхатар аст, зеро оби шўри баҳр баъзе микроорганизмҳои бемориоварро нобуд мекунад. Моҳиро низ баъди тайёр шудан ба зудӣ истеъмол кунед, зеро аз сабаби бўи махсус кардани моҳӣ мумкин аст, ки моҳии ба вайроншавӣ оғознамударо пай набаред.
С.АМИНИЁН
