Чӣ гуна фарбеҳ шавам?
Маро духтари (24-солаам) мавзунқомат мегуфтанд. Қоматбаланд ва ҳамагӣ 50 кг вазн доштам. Баъди ба шавҳар баромадан ва тавлиди тифлам вазнам ба 45 кг фаромад. Хеле харобам ва аз ин шармам меояд. Хўрокҳои серчарбуву серравған мехўрам, аммо… Чӣ бояд кард, то каме фарбеҳ шавам?
Гулосон, н. Ҳисор
Аз маслиҳатхонаи » Даво »
Фарбеҳӣ на ҳамеша аз пурхўрӣ ё хўрдани хўрокҳои серравған ба амал меояд. Диетологҳо собит сохтаанд, ки меъда на ҳамеша метавонад хўроки бадҳазмро бе душворӣ ҳал кунад. Аз пурхўрӣ кори ҷигар ва талхадон вайрон гашта, мубодилаи моддаҳо суст мегардад, ки аз ин ақрабаки вазн ба сўи беҳбуд ҳаракат нахоҳад кард.
Барои он ки вазнатонро зиёд намоед, ҳаҷми хўрокро на зиёд, балки назди духтур-эндокринолог рафта, хунатонро барои муайян намудани ҳормонҳои ғадуди сипаршакл ташхис намоед.
Бемориҳое ҳастанд, ки хоҳ- нохоҳ ба руҳияи шумо таъсир мерасонанд. Масалан, фикри шумо пурра ба «чӣ кунам, то фарбеҳ шавам?» равона карда шудааст. Эндокринолог шуморо аз ин варта берун меорад. Аз рўйи маслиҳатҳои ў амал намоед.
Асабҳоям хароб шудаанд
Пойҳоям бемадору камҳаракат шуда, шабона бехобӣ мекашам ва арақ мекунам. Баъзан дилам ба тапидан медарояд. Ба духтури равоншифоӣ муроҷиат кардам. Гуфт, ки асабҳоям хароб шудааст ва табобат низ муайян кард. Магар аз хасташавии асаб дилзанию арақкунӣ ба вуҷуд меояд?
Райҳонаи Аъзамҷон, н. Рўдакӣ
Аз маслиҳатхонаи » Даво »
Аломатҳои клиникии невростения гуногун аст. Мутахассисони соҳаи тиб харобшавии асабро ба ин намудҳо: гиперстен ва гипостен ҷудо кардаанд. Ба намуди аввал ангезандагии баланд, ба намуди дуввум ангезандагии сабуктар хос буда, дар ҳарду сурат шахс бетоқат шуда, ноустувории ҳолати ҳаяҷон, ҳисси хатар, саросемагӣ, арақкунӣ, дилзанӣ ё ҳиссиёти нофорам дар дил, дарди сар, мондашавӣ, паст шудани қобилияти корӣ, сустшавии хотираро эҳсос мекунад. Духтур дар ҳолати шумо ҳарду намудро муайян кардааст. Сабабҳои хасташавию беморшавии асаб бисёранд. Масалан, меҳнати дурударози фикрӣ, кам хоб кардан, азоби рўҳӣ кашидан, пайваста дар ҳаяҷон қарор доштан, пайиҳам ба вуқуъ пайвастани воқеаҳои нохуш… Шуморо лозим аст, ки тарзи ҳаёти худро тағйир дода, бештар дар ҳавои кушод сайру гашт намоед, истироҳат кунед, мусиқӣ гўш карда, хўрокҳои серғизо ва хўришҳои сабзавотӣ тановул намоед.
«Калидча»-и саломатӣ
Чанде пеш ба ман аз Россия занбўруғи чой (чайный гриб) оварда, гуфтанд, ки ин «калидча»-и саломатии бардавом аст. Мароқ намуда фаҳмидам, ки замбўруғи чойро дар тибби халқии рус чун даво барои дардҳои зиёде истифода мекардаанд. Бемор нестам, онро нўшам ё не?
Раҳима, н. Варзоб
Аз маслиҳатхонаи » Даво »
Дар таркиби ин нўшокӣ теъдоди ниҳоят калони компоненти фаъолу муфиди биологӣ: витаминҳо, ферментҳо ва дигар воситаҳои табобаткунанда мавҷуд аст. Бинобар ин онро ҳангоми бемориҳои гуногун истеъмол мекунанд. Ҳамчунин, он қодир аст, мубодилаи моддаҳоро дар ҳуҷайраҳо муътадил созад. Замбўруғи чойро чун воситаи шифобахш, алалхусус, ҳангоми эҳсоси вазнинӣ дар меъда, метеоризм, қабзияти шикам, гастроэнтерит, исҳоли хунин истифода мекунанд. Замбўруғи чой барои худро хуб эҳсос намудани одамони фишори хунашон пастбуда кўмаки зиёд мерасонад. Вақте ки хўрок дар меъда вазнинӣ мекунад, замбўруғи чойро нўшед. Он дарҳол меъдаи шуморо тоза мекунад. Ин барои онҳое, ки фарбеҳ шудан намехоҳанд, муҳим мебошад.
Маслиҳатҳои «Даво»-ро хонда худ қазоват намоед. Дар сурати дар сиришти худ эҳсос намудани яке аз ин ноҷўриҳо онро нўши ҷон намоед. Маззааш табъхушкунанда аст
Омодасоз Ҳусния Ҳафизова
