Бори аввал дар Беморхонаи клиникии №1-и шаҳри Хуҷанд амалиёти мураккаби пайвандсозии ҷигар ва гурда бомуваффақият анҷом дода шуд. Амалиёти ҷарроҳӣ таҳти роҳбарии директори Муассисаи давлатии «Маркази миллии илмии пайвандсозии узв ва бофтаҳои инсон», профессор Саидмаҳмуд Исмоилзода, сурат гирифт.
Дар ҷараёни амалиёт мутахассисони пешбари Маркази миллии илмии пайвандсозии узв ва бофтаҳои инсон дар ҳамкорӣ бо ҷарроҳони соҳибтаҷрибаи Беморхонаи клиникии №1-и шаҳри Хуҷанд ҷарроҳиҳои мураккаби пайвандсозии ҷигар ва гурдаҳоро дар сатҳи баланди касбӣ анҷом доданд.
Ба гуфтаи мутахассисони соҳа, ҳар ду амалиёти ҷарроҳӣ бе мушкилот анҷом ёфта, вазъи саломатии беморон ҳоло муътадил арзёбӣ мешавад. Беморон таҳти назорати доимии табибон қарор дошта, марҳилаи баъдиҷарроҳӣ ва барқарорсозиро паси сар мекунанд.
Ин дастоварди муҳим натиҷаи татбиқи пайвастаи барномаҳои давлатии рушди соҳаи тандурустӣ, таҳкими заминаи моддию техникии муассисаҳои тиббӣ ва бо таҷҳизоти муосир таъмин намудани беморхонаҳои вилояти Суғд арзёбӣ мешавад.
То имрӯз беморони гирифтори бемориҳои вазнин ва ниёзманд ба амалиёти пайвандсозии узвҳо барои гирифтани чунин хизматрасониҳои тиббӣ бештар ба пойтахти кишвар ё муассисаҳои тиббии хориҷӣ муроҷиат мекарданд. Ин ҳолат барои беморон хароҷоти зиёди молиявӣ ва мушкилоти муайяни ташкилиро ба миён меовард.
Акнун бо фароҳам гардидани имкони анҷом додани чунин ҷарроҳиҳои мураккаб дар вилояти Суғд, беморони ниёзманд метавонанд қисме аз хизматрасониҳои баландихтисоси тиббиро дар минтақаи худ дастрас намоянд.
Ба роҳ мондани чунин хизматрасониҳо дар Хуҷанд барои беҳтар намудани дастрасии аҳолӣ ба ёрии тиббии муосир, коҳиш додани хароҷоти беморон ва рушди минбаъдаи ҷарроҳии пайвандсозии узвҳо дар минтақа заминаи муҳим фароҳам меорад.
