Бо гузашти синну сол ва аз сабаби ҳавои сард, шамол ва дигар омилҳо пўсти дастон низ ожанг ва ҳар гуна доғҳо пайдо карда, ба нигоҳубини махсус зарурат пайдо мекунанд.
Мо якчанд дастурамали ниқобҳои хонагиро пешкаши шумо менамоем. Ниқобҳоро барои дастон, беҳтараш, шабона пеш аз хоб истифода баред ва пеш аз он ки ниқобро ба дастонатон молед, хуб шўед ва бо сачоқча хушк намоед.
Ниқоби асалӣ
-Асал барои ҳама навъи пўст мувофиқ буда, пўстро маҳин ва ҷилонок менамояд. 15 гр асалро бо зардии як дона тухм ва 25 гр равғани зайтун ё бодом ва як қатра оби лиму омехта намуда, ба дастонатон молида, то субҳ нигоҳ доред.
Ниқоб бо ҷави русӣ
-Як қошуқча асал, як қошуқча шир, як қошуқча равғани зайтун ва се қошуқча ҷави русиро бо ҳам омехта намуда, ба дастонатон моледу аз болояш дастпўш пўшида хобед.
-Се қошуқча шири бурида (творог) ва як қошуқча равғани офтобпарастро бо ҳам омехта намуда, ба дастони тоза молида, муддати 20 дақиқа нигоҳ дошта,пасон шўед.
-Як қошуқча ҷави русӣ (овсяные хлопя)-ро дар қаҳвамайдакунак майда намуда, бо як қошуқча асал ва як қошуқча оби лиму хуб омехта намуда, ба он каме қаймоқ ҳамроҳ намуда, хуб кобед. Ба дастон молида, 15-20 дақиқа нигоҳ дошта, пасон шўед.
Ниқоб аз сабзӣ
-Дар блендер сабзии тару тозаро хурд намуда, (то ки се қошуқча шавад) ва як қошуқча қаймоқ, як қошуқча равғани зайтунро бо ҳам омехта намуда, ба дастон молед ва муддати 20 дақиқа нигоҳ дошта, пасон шўед.
Ниқоб аз ҷаъфарӣ
-Якчанд бандча ҷаъфарӣ (петрушка)-ро хурд намоед, то ки як қошуқчаи майда шавад ва бо 1-2 қошуқча шири бурида (творог) ва 0,5 қошуқча равғани моҳӣ ҳамроҳ намуда, ба дастонатон молед ва пас аз 20 дақиқа шўед.
-Нимто авокадоро лат зада, як то тухмро низ алоҳида лат зада, бо ҳам омехта намуда, ба дастон молед. Ниқоби ғизодиҳандаро ба дастонатон молида, 20-30 дақиқа нигоҳ дошта, пасон шўед.
-Ба дастонатон равғани офтобпараст ё зайтун молида, дастпўши пахтагӣ пӯшида, 20 дақиқа нигоҳ доред, пасон шўед.
Ниқоби себӣ
-Нимто себ, се қошуқча асал, зардии як дона тухм ва як қошуқча равғани растаниро бо ҳам омехта намуда, ба дастонатон молед ва 15 дақиқа нигоҳ дошта, пасон шўед.
-Як қошуқча равғани зағир, як қошуқча асал, ва ду қошуқча оби лимуро бо ҳам омехта намуда, ба дастонатон молед. Муддати 2 соат нигоҳ дошта, пасон бо обҷўши картошка шўед.
Фароҳамсоз М. ДАВЛАТОВА
