Вобаста ба пахши иттилоот дар шабакаҳои иҷтимоӣ доир ба паҳншавии хантавирус, ки чанде қабл дар киштии Hondius дар наздики ҷазоири Канар хуруҷ кард, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон изҳор дошт, ки дар қаламрави ҷумҳурӣ ҳодисаҳои сирояти хантавирус ба қайд гирифта нашудааст ва хавфи паҳншавияш дар кишвар ночиз мебошад.
Чуноне дар ниҳод тавзеҳ доданд, хантавирусҳо гурӯҳи вирусҳое мебошанд, ки асосан тавассути хояндаҳо паҳн шуда, метавонанд дар одамон бемории вазнини сироятӣ ангезанд.
Бо назардошти омилҳои табиӣ ва экологӣ дар ҷумҳурӣ пайваста мониторинги эпидемиологӣ ва чорабиниҳои профилактикӣ гузаронда мешаванд. Аз ин рӯ, вазъият таҳти назорати мақомоти тандурустӣ қарор дорад. Риояи чораҳои оддии беҳдоштӣ метавонад хатари сироятро пешгирӣ кунад. Аз ҷумла:
- тоза нигоҳ доштани хонаҳо, таҳхонаҳо, анборҳо ва ҷойҳои нигоҳдории маҳсулот;
- пешгирии воридшавии хояндаҳо ба манзил ва маҳалҳои нигоҳдории озуқа;
- нигоҳдории маҳсулоти хӯрокворӣ дар зарфҳои пушида;
- истифодаи дастпӯшак ва ниқоб ҳангоми тоза кардани ҷойҳое, ки эҳтимол хояндаҳо бошанд;
- сари вақт нест кардани партовҳои маишӣ;
- муроҷиати фаврӣ ба муассисаҳои тиббӣ ҳангоми пайдо шудани нишонаҳо, аз ҷумла табларза, дарди мушакҳо, сустӣ, мушкилоти нафаскашӣ ё дарди шадиди сар.
Вазорат тавсия медиҳад, ки шаҳрвандон танҳо ба маълумоти расмӣ эътимод карда, аз паҳнсозии ахбори тасдиқнашуда худдорӣ намоянд.
