Шири модар ғизои беҳтарин ва бехатартарин барои кўдакони хурдсол аст
Дар таркиби шири модар барои солиму бардам инкишоф ёфтани тифл тамоми моддаҳои зарурӣ мавҷуданд, хусусан дар шаш моҳи аввали ҳаёт. Таркиб ва сохти шири модар аз лаҳзаи ба дунё омадани навзод рўз аз рўз, мутобиқ ба талабот ва ниёзи тифл, ки дар инкишоф аст, тағйир меёбад. Масалан, калтсий ва фосфор дар шири модар ҳамарўза ба он миқдорест, ки барои рушди тифл заруранд. Ғайр аз ин, шири модар он моддаҳоеро дорад, ки талаботи нодири инсони навзодро ба чунин моддаҳои ғизоӣ, ба мисли баъзе аз кислотаҳои ивазнашавандаи чарбии нимсер, сафедаҳои шир ва оҳани ба шакли осон ҳазмшавандаро қонеъ менамоянд. Он, ҳамчунин, моддаҳои фаъоли иммунологӣ ва биологиро дорост, ки дар омехтаҳои ширии кўдакона мавҷуд нестанд.
Бояд таъкид намуд, ки шири модар тифлро аз сироятҳои бактериявӣ ва вирусӣ эмин нигоҳ медорад ва метавонад ба мутобиқшавии рўдаи навзод ва инкишофи он мусоидат намояд.
Гайр аз ин, кўдакон ҳангоми синамаконӣ аз бемориҳои сироятӣ эмин мебошанд ва дар онҳо заминаи мустаҳкаме барои инкишофи баъдинаи рўҳию ақлонӣ (инкишофи мағзи сар) гузошта мешавад.
Синамаконӣ на танҳо барои инкишофи ҷисму ҷони тифл зарур аст, он ҳамчунин муҳофизи беҳамтои солимии модар аст. Ҳангоми макидани сина ҳормони окситатсин пайдо мешавад, ки кашишхўрии бачадонро зиёд менамояд ва модарро аз хунравии баъди таваллуд эмин медорад. Қатъ шудани ҳайз бошад, имкони ҳифзи протеин, маводи оҳандор ва дигар моддаҳои барои ҷисми модар зарурро то анҷоми давраи ширдиҳӣ дорад.
Синамаконӣ, инчунин омили муҳими пешгирии ҳомиладоршавии бемаҳалу бенизоми зан аст.
Ва муҳим аз ҳама, ширдиҳӣ хавфи инкишофи бемориҳои саратони ғадуди сина, тухмдон ва бачадонро кам сохта, занро аз остеопароз ҳимоя месозад ва боиси хавфи паст шудани ҳамли номатлуб дар давраи синамаконӣ, зуд баргаштани вазн ба ҳолати муқаррарии пеш аз таваллуд гашта, аз бемориҳои устухон ва фарбеҳӣ муҳофизат менамояд.
Мавҷуда УРМАНОВА,
духтури занонаи Беморхонаи марказии н. Кўшониён, сарвари ҶДММ “Марями Муродҷон”
