Чуноне мегӯянд, қиссаҳои ғароиб натанҳо дар киною китоб ба вуқуъ меоянд. “Даво” барои шумо якчанд ҳодисаи воқеан ҳайратоварро гирд овард, ки Китоби рекордҳои Гиннесс тасдиқ кардааст.
- б46,5°C – чунин буд баландтарин ҳарорати бадани одам, ки соли 1980 дар Уилли Ҷонси амрикоӣ ба қайд гирифтанд. Ҷавонро баъди офтобзанӣ ба беморхона оварданд. Бо вуҷуди ҳарорати фавқулодда Уилли зинда монд ва пас аз се ҳафта беморхонаро тарк намуд.
- Пасттарин ҳарорати бадан — 14,2°C — ро ҳароатсанҷ 23 феврали соли 1994 дар Канада дар Карли Козлофскии дусола нишон дод. Духтарча шаш соатро дар сармои қаҳратун гузаронда, аҳволаш ниҳоят бад мешавад. Ба ин нигоҳ накарда, табибон тавонистанд Карлии дусоларо наҷот диҳанд.
- Китоби Гиннесс бисёр воқеаи қади ниҳоят дароз, ё баръакс, беҳад кутаҳро медонад. Лекин вақте як одам дар тули умраш ҳам паканаю ҳам аз ҳад қадбаланд шуда бошад, танҳо як маротиба рӯй додааст. Қади зодаи Австралия Адам Райнер дар 21-солагияш ҳамагӣ 118 сантиметрро ташкил медод. Баъди даҳ сол, яъне соли 1930, он аллакай ба 218 сантиметр расид. “Ҷаҳиши” якметра саломатии Адамро барбод дод ва боқии умрро вай дар бистар гузаронд.
- Амрикоӣ Ҷеймс Генри Бретт дар рӯйи кати ҷарроҳӣ куҳансолтарин шахс шуд. Рӯзе, ки дили Бреттро табибон муваффақона ҷарроҳӣ карданд, 111 солаю 105 рӯза буд.
- Рекорди ҳайратангези дорухурии Кей Килер аз Зимбабве то ҳол побарҷост. Дар тӯли 21 соли муолиҷа (аз 9 июни соли 1967 то 19 июни соли 1988) мавсуф беш аз ним миллион, аниқтараш, 565.939 адад ҳаб хӯрдааст. Рӯзе ба ҳисоби миёна 73 ҳаб. Агар ин ҳама ҳабро қатор чинанд, 3,4 километр тӯл мекашид.
- Аз рӯйи теъдоди ҳангуфти сӯзандору бошад, касе то ҳол ба Сэмюэл Дэвидсон (Британияи Кабир) баробар шуда наметавонад. Ба вай, ки гирифтори диабети қанд аст, 78.900 маротиба инсулин задаанд.
- 11 ноябри соли 1995 Пегги Ланн аз Пенилвания якуми дугоникҳо — духтарча, баъд аз 84 рӯз дуюми дугоникҳо – писарчаро таваллуд кард. Ин тӯлонитарин фосилаи таваллуди бисёрҷанинӣ маҳсуб меёбад.
- Хурдсолтарин модар дар таърихи тиб — Лина Меина аз Перу ба шумор меравад. Вақте ӯ писарча таваллуд кард, ҳамагӣ 5 сол дошт! Тифл тавассути чоки қайсар ба дунё омад. Линаи 5-сола аз кӣ ҳомила шуда буд, то ҳол махфӣ мондааст.
- Калонтарин миқдори хуни ҳангоми ҷарроҳӣ истифодашуда — 2400 воҳиди донорӣ (1080) мебошад. Ин миқдор хунро ба Уоррен Ҷирич, бемори гемофилия гузаронданд. Ҷарроҳӣ моҳи декабри соли 1970 сурат гирифта буд.
- Рекорди муддати мадид аз кор мондани дил норвегӣ Ян Ревсдал мансуб аст. Ян моҳигир буда, як шаби зимистон аз киштӣ ба об афтид. Вақте ҷавонмардро ба беморхона расонданд, ҳарорати баданаш 24°C буду дилаш аллакай 4 соат боз намезад. Хушбахтона, табибон тавонистанд, ҳолаташро ба эътидол оранд ва як моҳ пас Ян боз ба баҳр баромад.
- Пойгачии «Формула-1» англис Дэвид Перли тобистони соли 1977 дар натиҷаи бероҳа шуда, чанд маротиба ғел хӯрдани болидаш ба миқдори рекордӣ зарб ёфт – устухонаш аз 29 ҷой шикаста, аз 3 ҷояш баромад. Аснои дар беморхона ба Дэвид ёрӣ расондан дилаш 6 маротиба аз кор монд. Пойгачӣ тавонист боз ба варзиш баргардад ва танҳо соли 1987 болидрониро қатъ намуд. Тарҷумаи Хуршеди Ҷовид
