Аневризмаи шоҳраг — ин ҳолати патологие мебошад, ки дар он зиёда аз 1,5 баробар васеъшавии диаметри шоҳраг муайян мегардад. Яке аз аворизҳои хавфноктарини ин беморӣ кандашавии қабатҳои он (диссексия) ва порашавии тамоми қабатҳо (разрыв) мебошад. Дар ҳолати нагузаронидани амали ҷарроҳӣ ҳангоми ҷой доштани диссексияи шоҳраг дар рӯзи аввал 33%- и беморон, 50%-и беморон дар давоми 48 соат ва 75%-и беморон дар давоми 2 ҳафта вафот менамоянд.
Бештари ҳолатҳо аневризмаи шоҳрагро ҳангоми ташхисҳои профилактикӣ дар ренгенографияи қафаси сина муайян менамоянд, вале диссексияи он, шадидан шуруъ шуда, дар аксари ҳолатҳо бо дардҳои сахти қафаси сина ва тахтапушт шурӯъ мешавад, ки бо томография компютерӣ бо контраст ташхис карда мешавад.
Масалан ба Бемористони Ибни Сино бемор К.Ҷ., мутаваллиди соли 1987, бо шикоятҳои дард дар қафаси сина, нафастангӣ ва беҳолӣ муроҷиат кард. Дар бемор ҳангоми ташхис — норасогии назарраси даричаи шоҳраг, аневризмаи бузурги реша ва қисми болоравандаи шоҳраг то 9см, диссексияи навъи I (DeBakey) бо паҳншавӣ ба даҳонаи шараёнии коронарии чап муайян гардид. Аз суханони бемор маълум гардид, ки ӯ аз бемории худ огоҳ буда, соли 2003 ҳангоми гузаштани муоинаи тиббӣ дар ЭхоКГ ташхиси Маҷрои кушодаи артериалӣ муайян шудааст. Соли 2016 дар бемор аневризмаи шоҳраг бо андозаи 5см бо норасогии нисбии даричаи шоҳраг муайян мегардад ва ба ӯ гузаронидани амали ҷарроҳӣ тавсия дода мешавад, вале аз ин амал бемор дасткашӣ менамояд.
Пас аз он ки бемор К. Ҷ. ба Бемористони Ибни Сино муроҷиат намуд, ӯ аз ҷониби ман муоина гардида, гузаронидани амали ҷарроҳии Бенталл-Де Боно тавсия дода шуд. Санаи 18 апрели соли равон амали ҷарроҳии Бенталл — Де Боно, тармими даҳонаи шараёни коронарии чап бо бастани маҷрои кушодаи артериалӣ анҷом дода шуд. Ва бо ҳамин бемор дар ҳолати қаноатбахш ба хона мураххас карда шуд.
Аз ин рӯ, таъкид менамоям, ки саривақт анҷом додани амали ҷарроҳӣ на танҳо ҳолати беморро хуб мегардонад, инчунин ӯро аз марг наҷот медиҳад! Ба онҳое, ки гирифтори бемориҳои дил ҳастанд, тавсия медиҳем, ки ҳеҷ гоҳ табобатро ба таъхир нагузоред!
Ҷаҳонгир Раҷабов, кардиоҷарроҳи Бемористони Ибни Сино
