Мусоҳиба бо провизори дорухонаи №90-и ҶДММ “Ориёнфарм” Диловар Савруллоев
— Сараввал, мегуфтед, ки дорухонаи №90-и ҶДММ “Ориёнфарм” кай таъсис ёфтааст ва хизматрасонӣ ба харидорон дар ин дорухона чӣ гуна ба роҳ монда шу- даст?
— Аслан, дорухонаи мо навтаъсис аст. Он моҳи августи 2020 таъсис ёфтааст. Номи фирмавии дорухона “ҶДММ “Ориёнфарм”, №90” аст, вале он зери бренди “Дорухонаи “Махсус” дар кӯчаи Нусратулло Махсум, 74/4 фаъолият мекунад. Дорухона яке аз камтарин дорухона дар шаҳри Душанбе аст, ки бо таҷҳизоти муосири электронӣ пурра таъмин мебошад.
Навобаста аз таҷрибаи кории кам дорухонаи мо аллакай муштариёни доимии худро пайдо кардааст. Мо пайваста бо муштариёни худ дар мавриди интихоби доруҳо маслиҳат медиҳем ва мекўшем бо харидорон хушмуомила ва бо тамкин сўҳбат намоем.
Инчунин, дар дорухонаи мо тамоми доруҳо бо тарзу усулҳои ба худ хос нигоҳдорӣ мешаванд. Дар дорухона яхдон, ҷевонҳои махсус ва рафҳое ҳастанд, ки доруҳо вобаста ба хусусияташон нигоҳ дошта мешаванд.
— Ҳуҷҷатгузории дорухона дар кадом сатҳ қарор дорад ва оё аз ҷониби кормандони Раёсати назорати давлатии фаъолияти фармасевтӣ корҳои фаҳмондадиҳӣ дар ин самт гузаронида мешавад?
— Ҳамаи ҳуҷҷатгузории дорухона ба талаботи стандартҳои дохилӣ ва байналмилалӣ ҷавобгўй аст. Чун дорухонаи мо нав таъсис ёфтааст ва ҳар як коргоҳ пеш аз таъсисёбии худ ҳуҷҷатгузориро омода менамояд. Дар ин масъала то ба имрўз касе ба мо эрод нагирифтааст. Кўшиш менамоем, ки дар оянда низ ҳуҷҷатгузориҳоро тавре омода намоем, ки ба талаботи амалкунандаи мамлакат ҷавобгўй бошанд.
Албатта, аз ҷониби кормандони Раёсати назорати давлатии фаъолияти фармасевтӣ пайваста корҳои фаҳмондадиҳӣ гузаронида мешавад. Дар фаъолияти яксолаи мо аллакай, чандин маротиба корҳои фаҳмондадиҳӣ гузаронида шуд, ки мо тавонистем камбудиҳои худро ҳаллу фасл намоем. Онҳо бештар ба мо дар мавриди доруҳои қалбакӣ, доруҳои мўҳлати истифодаашон гузашта ва дигар масъалаҳои дорухонадорӣ маслиҳату машваратҳо медиҳанд.
— Тавре медонем, ҳар як дору хусусияти нигоҳдории худро дорад. Оё дар дорухонаи шумо талаботи нигоҳдории доруҳо ба назар гирифта мешавад?
— Ҳамеша кўшиш мекунем, ки талаботи нигоҳдории доруҳо ба назар гирифта шавад ва ҳар як дору вобаста ба хусусияти худ дар ҷойҳои махсус нигоҳ дошта шавад. Медонем, ки кадом доруро дар кадом шароит нигоҳ бояд дошт. Баъзе доруҳое ҳастанд, ки онҳоро бояд дар яхдон нигоҳ дошт, баъзеи дигарро бояд дар соя нигоҳ дошт, ки рӯшноӣ ба онҳо таъсири манфӣ нарасонад.
