20 июл дар шаҳри Душанбе маросими ифтитоҳи нашри махсуси Мактаби минтақавии аврупоии Ташкилоти умумиҷаҳонии тандурустӣ (ТУТ) оид ба сифати нигоҳубин ва бехатарии беморон барои кишварҳои Осиёи Марказӣ баргузор гардид.
Дар чорабинӣ вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, намояндагони ТУТ ва мутахассисони соҳаи тандурустӣ иштирок карданд.
Зимни ҳамоиш зикр шуд, ки мактаби мазкур роҳбарон ва мутахассисони соҳаи тандурустии кишварҳои Осиёи Марказиро барои такмили сифати хизматрасониҳои тиббӣ, таҳкими бехатарии беморон ва татбиқи усулҳои муосири идоракунӣ муттаҳид месозад.
Мактаби мазкур бо ташаббуси Дафтари минтақавии ТУТ барои Аврупо, дар ҳамкорӣ бо Донишгоҳи NOVA-и Лиссабон ва бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Дафтари ТУТ дар Тоҷикистон ташкил шудааст.
Ба гуфтаи масъулон, нашри махсуси соли 2026 дар посух ба ниёзҳои кишварҳои Осиёи Марказӣ ва Иттиҳоди Давлатҳои Мустақил барои мубодилаи таҷриба ва ҳалли мушкилоти умумии низоми тандурустӣ роҳандозӣ гардидааст.
Вазири тандурустӣ Ҷамолиддин Абдуллозода таъкид намуд, ки баргузории аввалин нашри махсуси ин мактаб дар Тоҷикистон барои кишвар мояи ифтихор буда, метавонад ба як платформаи устувори минтақавӣ барои омӯзиш, табодули таҷриба ва рушди ҳамкориҳо табдил ёбад.
Дар навбати худ, директори Шуъбаи пешгирӣ ва тарғиби саломатии Дафтари минтақавии ТУТ барои Аврупо Гундо Вайлер изҳор дошт, ки ин мактаб танҳо як барномаи таълимӣ нест, балки заминаест барои омӯзиши муштарак, рушди роҳбарӣ ва таҳкими ҳамкориҳо ҷиҳати баланд бардоштани сифати хизматрасониҳои тиббӣ ва таъмини бехатарии беморон.
