15 сол муқаддам ба бемории варами рўдаҳо гирифтор шуда, табобат намуда будам, аммо осори беморӣ дар ман боқӣ мондааст. Мегўянд, ки ман на рўдаҳо, балки асабҳоямро табобат намоям, то аз ин мушкилот халос шавам. Рост аст?
Гулбаҳор, ш. Душанбе
Даво
Яке аз вазифаҳои муҳими рўдаҳо дар он зоҳир мегардад, ки аз хўрокҳо ҳама моддаҳои муфидро, ки ба одам заруранд, ҷудо менамоянд. Бо ёрии ферментҳои коркардашуда рўдаи борик сафеда, чарб, карбогидратҳо, микроэлементҳову витаминҳоро азхуд менамояд. Азбаски якҷоя бо хўроки ҳазмшуда ба рўдаҳо микробҳову вирусҳои дардовар ворид мегарданд, организм ба ҳимояе, ки бехатарии онро таъмин сохта тавонад, ниёз дорад ва ҳамин ҳимоя аз тарафи рўдаи ғафс, ки дар он бактерияи муфид вуҷуд дорад, мерасад.
Дар рўдаи ғафс витамини гурўҳи В, асоси масунияти ҳуҷайрагӣ –Т– лимфосид ва иммунноглобулин низ мавҷуд мебошад. Дар баъзе ҳолатҳо чунин ҳам мешавад, ки рўдаи меҳнатдўсту хизматрасон яку якбора вазифаи худро иҷро карда наметавонад.
Чӣ чиз боиси халалёбӣ мегардад? Рўдаро узви ҳассос ва баъзан тарсончак ҳам мегўянд. Каме асабӣ шудан ба фаъолияти рўдаҳо таъсир расонида, дард, дамиши шикам, ки дар илми тиб диареяи эмотсионалӣ мегўянд, пайдо мешавад. Ин ҳолат табобатро талаб намекунад. Ба сифати ёрии аввалия метавон доруҳои ношпа ва валерианаро истифода бурд. Хўрокхўрии нодуруст: тундӣ, обҳои газнок, тағйирёбии обу иқлим, истеъмоли ҳар гуна доруворӣ: дорувории оҳандор, антибиотикҳо, баъзе витаминҳо, бемориҳои узвҳои ҳозима, бемориҳои вирусӣ, инфексияи рўдаҳо, заҳролудшавӣ аз хўрокворӣ низ боиси халалдор гаштани кори рўдаҳо мегардад.
Шуморо лозим аст, ки ҳамеша дар ҳаракат бошед: давидан, варзиши сабук, шиноварӣ дар ҳавз, аквааэробика, бозиҳои варзишӣ метавонанд гардиши хунро дар рагҳои рўдаҳо беҳтар гардонанд. Рўдаҳоятон боз ҳам фаъолтар мегарданд, агар қабл аз ба варзиш машғул шудан як пиёла оби ҷўшонидашудаи ширгарм нўшед.
Асабҳоятонро ором нигоҳ дореду саломат бошед!
Картошка фишорро баланд мекунад?
Баъзан фишори хунам баланд мешавад. Як рафиқам гуфт, ки истеъмоли картошка ба ашхоси фишори хунашон баланд зарарнок аст. Магар истеъмоли картошка фишори хунро баланд месозад?
Ф. Муҳиддинов, ш. Душанбе
Даво
Олимони амрикоӣ тайи 20 сол тарзи хўрокхўрии 187 ҳазор нафарро таҳқиқ намуда, ба хулосае омаданд, ки ашхоси ҳафтае 4 маротиба картошка истеъмол мекардагӣ нисбат ба афроди ҳафтае як маротиба картошка мехўрдагӣ бештар гирифтори фишорбаландӣ мешудаанд. Картошка бевосита боиси фишорбаландӣ намешавад. Дар сурати онро бо намак истеъмол кардан мумкин аст фишори хунатон баланд гардад. Ҳамчунин карбогидратҳои таркиби он осон ба ҷисм ҷаббида мешаванд, ки ин боиси фарбеҳӣ мегардад. Фарбеҳӣ ба фишорбаландӣ меорад.
Фоиданоктарин усули истеъмоли картошка бо пўсташ ҷўшонидани он аст. Дар ин ҳол калийи таркиби он, ки фишори хунро паст мекунад, хуб ҳифз мешавад.
Бемадор шудаам
Барои баланд бардоштани масунияти баданам аз роҳу воситаҳои гуногун истифода мебарам. Масалан, истироҳати хуб намуда, хўроки серғизо, меваҷоту сабзавоти аз витаминҳо бой мехўрам. Аммо ҳамоно масунияти баданам паст аст. Чӣ бояд кард?
Ориф, ш. Истравшан
Даво
Ҳама кўшишҳоятон бенатиҷа мемонанд, агар дар организм инфексияи куҳнашудаи сусткунандаи масуният вуҷуд дошта бошад. Инҳо метавонанд бемориҳои танзиллит, гайморит ва ҳатто дандонҳои сангпайдокарда бошанд. Бештар сирпиёз хўред. Сирпиёз дар набард бо стафилоккокҳо, стрептоккокҳо ва дигар микробҳо ғолиб меояд. Сирпиёз қодир аст бо вирусҳое мубориза барад, ки ҳатто антибиотикҳо нобуд сохта наметавонанд. Инчунин ҳар гоҳ биниатонро бо маҳлули намаки баҳрӣ (як қошуқча намак ба як истакон оби ҷўшонидашудаи ширгарм) чайқонед.
Омодасоз: Ҳусния
