«Доруфарм»-нишони дилпурӣ аз худ
Бо кори фармасевтӣ Фаридун Ҷабборов ҳанӯз дар давраи донишҷӯйи факултаи фармасевтии Донишгоҳи давлатии тиббии Тоҷикистон ба номи Абуалӣ ибни Сино будан ошно гашт. Ба шарофати бародаронаш, ки дар самтҳои гуногуни соҳаи тиб фаъолият доштанд.
Чун шуғли яке аз онҳо дорусозӣ буд, тавонист меҳри ин пешаро дар қалби додараш низ ангезад. Бо фаъолият дар ҶДММ «Тиб барои шумо» ва КВД «Фармаколог» корозмуда шуда, Фаридун дар навбати худ тасмим гирифт, ки дар ин ҷода донишандӯзони пурталошро роҳнамо бошад.
— Донишу таҷрибаи солҳо андӯхта ба имкони фаъолияти мустақил дилпурам кард ва соли 2013 ширкати хусусии «Доруфарм»-ро таъсис додам. Алҳол дар дорухонаҳои он беш аз 150 нафар фаъолият доранд, ки аксарашон донишҷӯй мебошанд.
Онҳо дар баробари донишу таҷриба андӯхтан боз аз ҷиҳати молиявӣ дастгирӣ меёбанд, ки ин шароити зиндагиашонро беҳтар месозад, — аз дирӯзу имрӯзи кораш ёд меорад ҳамсуҳбатам ва меафзояд. — Вале ин ҳамаро ман ҳанӯз оғози фаъолиятамон дар фармасевтика мешуморам ва бо андаке комёбӣ хотирҷамъ шудан дуруст нест. Бахусус, дар соҳаи мо, ки ниҳоят босуръат рушд мекунад ва бояд пайваста дар ҷараёни дастовардҳои он бошӣ.
ҲАМКОРӢ БО ШИРКАТҲОИ ВАТАНӢ
Фаридун Ҷабборов бар он назар аст, ки имрӯз дар кишвар дар самти дорусозӣ ҳеҷ мушкиле пешорӯи соҳа нест. Дар роҳандозӣ намудани истеҳсолоти доруворӣ ва ҳам воридоти он Ҳукумати кишвар ба соҳибкорон як қатор имтиёз додааст, ки дар натиҷа ниёзмандон бидуни мушкилӣ дорувории заруриро аз дорухонаҳо дастрас карда метавонанд.
Ба гуфти сарвари «Доруфарм», онҳо доруҳоро вобаста ба талаботи аҳолӣ ворид месозанд. Агарчи таркиби доруҳо якхела асту танҳо номи ширкатҳои истеҳсолкунанда гуногун, харидорон ё беморон дорувории ширкатҳои маъруфи кишварҳое, чун Русия, Покистон, Ҳиндустон ва Украинаро афзал медонанд. Зимнан, аз маводи доругии ширкатҳои ватанӣ низ пурсон мешаванд.
Дар баробари ҳамкории судманд бо ширкатҳои хориҷӣ корхонаҳои маҳаллӣ низ дар мадди назар қарор доранд. Ҳамин аст, ки “Доруфарм” барои саривақт қонеъсозии талаботи ниёзмандон аз ширкатҳои «Тиб барои шумо», ВежаФарм» ва «Сино-2013» низ дору мегирад.
— Ҳар касб нозукиҳои хоси худро дорад, ки онҳоро бояд ба эътибор гирифт. Кори фармасевт истисно нест. Яъне мо, бояд пеш аз ҳама, ба интихоби дурусти доруворӣ, сифат, тарзи муқарраршудаи нигаҳдорӣ ва муҳлати истифодаи онҳо диққат диҳем. Чунки дар ниҳоят сухан аз саломатию ҳаёти одам меравад, ки онро, масалан, доруи муҳлати истифодааш гузашта зери хатар мегузорад. Ба ин набояд роҳ дод, — иброз медорад Фаридун Ҷабборов.
МУШКИЛИ КУҲНАИ ХОНДАНИ ДОРУХАТ
Фаридун мегӯяд, ки рисолати фармасевт танҳо ба бемор дору додан набуда, мебояд ба бемор тарзи истифодаи онро фаҳмонад. Бо вуҷуди дар дорухат тарзи истифодаи доруро қайд кардани табиб, беҳтар аст, ки болои қуттии дору кай, дар кадом ҳолат ва чӣ миқдор нӯшидани дору навишта шавад. Фармасевт дар давоми таҷрибаи корӣ бо хатти табиб ошност, вале аксари беморон навиштаи табибонро хонда наметавонанд.
— Баъзан дар дорухати табиб хато мешавад. Дарҳол ба вай занг зада, бо ҳамдигарфаҳмӣ мушкили беморро осон менамоем. Яъне, ин рисолати дигари мост, ки беморро бо духтур бипайвандем. Аз ин хотир, фармасевт бояд дорои хислатҳои наҷиби инсонӣ, ба мисоли хушмуомилаю оромтабиатӣ, хоксорию хайрхоҳӣ бошад. Зеро ҳамарӯза бо одамони гуногунхислат муошират дорад. Бо эҳтирому сухани хуш ба онҳо хизмат расондан аз рисолатҳои инсонию касбии ӯст.
Нафароне, ки чунин сифатҳоро надошта бошанд, беҳтараш, орзуи касби дорусозро накунанд, — хулосаи ғайричашмдошт кард Фаридун Ҷабборов.
Паймонаи ҶОВИДОН, “Даво”
