Тибқи омор ҳар дуюмин мард пас аз 50-солагӣ ба бемории гиперплазия (аденомаи ғадуди простата) гирифтор мешавад.
Ин аз он сабаби рух медиҳад, ки дар пиронсолӣ вақти коҳиш ёфтани кори ғадудҳои ҷинсӣ кори ғадуди простата низ суст мешавад. Бофтаи часпаки он қисман бо бофтаи пайвастсоз омехта мешавад. Пас аз панҷоҳсолагӣ баъзан ғадудҳои атрофи шошараҳа (уретра) месабзанд. Чуноне маълум аст, ин ғадудҳо ба ғадуди простата расида меистанд. Дар натиҷа дар простата навъи варами бехатар (аденома) падид меояд.
Аденома ба ҷом, яъне дастгоҳи пайвастшавии воқеъ дар масона фишор оварда, кори мўътадили онро халалдор менамояд, ки дар ин ҳол баровардани пешоб душвор мешавад. Дар натиҷаи ба рўдаи рост фишор овардани навъи варами бехатар дар кӯҳансолон сахт шудани дарун ба вуқўъ меояд.
Халал ёфтани фаъолияти ғадуди простата дар мардҳои миёнасол низ ба мушоҳида мерасад.
Сабабҳояш бемории бавосир, худдорӣ намудан аз наздикии ҷинсӣ, қабзияти бардавом, камҳаракатӣ, риоя накардани реҷаи истеъмоли хўрок ва майл намудан ба нўшокиҳои спиртӣ мебошанд.
Дар марҳилаи аввали пайдошавии аденома мард ҳиссиёти нохушро дар зери камар, баъдан нороҳатӣ ва ҳисси холӣ нашудани масонаро эҳсос мекунад. Сипас дардҳои сабук пайдо шуда, пешобкунӣ душвор мегардад ва баъзан вақт дар пешоб хун пайдо мешавад. Бо ин нишонаҳои нохуш бехобӣ, вайроншавии хотира ва вайроншавии фаъолии ҷинсӣ низ ҳамроҳ мешаванд. Дар сурати сари вақт табобат накардан пайдо шудани варам ва заҳролудшавии бадан мушоҳида мегардад.
Бо ин мушкилиҳо чӣ гуна бояд мубориза бурд ва ба куҷо муроҷиат кардан лозим аст?
Албатта, ба табиб уролог-андролог, ки дар чунин ҳолатҳо ба шумо кӯмак мерасонад.
Ҳангомӣ муроҷиат ба уролог шуморо чӣ интизор аст?
Табиб уролог бояд боварӣ ҳосил кунад, ки бандшавии пешоб, ки шуморо азият медиҳад, аз сабаби бемории ғадуди простата мебошад.
Барои ин табиб-уролог ба шумо ултрасадои ғадуди простата, холишавии масона аз пешоб, таҳлили хун барои мавҷуд набудани ҳуҷайраҳои саратон дар ғадуди простата (ПСА), ташхиси биохимиявии хун (креатинин, мочевина) ва таҳлили пешобро таъин мекунад. Ташхис ва табобати саривақтии ин беморӣ ба бемор дар мубориза ба ин мушкилиҳо кӯмак мерасонад.
Ҳоло, хушбахтона, бо ёрии технологияи муосир бидуни усули ҷарроҳӣ, тавассути муолиҷаҳо табобат намудани гиперлазия (аденома)-и бехавфи простата 80-90 фоиз натиҷаи интизоршударо нишон дода истодааст. Ин рақамҳо нишондиҳандаи хеле баланд маҳсуб мешаванд.
Набояд фаромўш кард, ки ғадуди простата дар ҳаёти мард нақши беназир дошта, дар маҷмуъ ба саломатии ӯ таъсири назаррас мерасонад. Беҳуда нагуфтаанд, дили дуюми мард ин ғадуди простата аст.
Аз ин лиҳоз, бо эҳсоси ҷузъитарин ноҳинҷорӣ дар мавзеи ғадуди простата мардҳоро лозим аст, ки ба мутахассис муроҷиат намоянд. Аз хотир набароред: пешгирии беморӣ беҳтар аз табобат аст!
Саймуҳаммад АТОЕВ,
табиби уролог-андрологи
МСШ №7, шаҳри Душанбе
