Нисфи шаб марду зани солхӯрдае мушавваш ба дорухона даромаданд. Ҳаросон ба рафҳои сершумор чашм давонда, кадом як доруеро меҷустанд. Нигина, ки аз нигоҳи аввал шитобзадаю хавотир будани ин зану мардро фаҳмид, дарҳол пурсид:
— Холаҷон, чӣ хизмат кунам? Кадом дору ба шумо даркор?
— Мо то назди худат омадан 10 дорухонаро гаштему доруи даркориро наёфтем, духтарам. Шояд дар дорухонаи шумо бошад, гуфта даромадем. Писарам бемори вазнин аст, аз коронавирус сахт азоб мекашад. Ҷони хола, умракат дароз шавад, ба мо ана ҳамин ду доруро ёфта деҳ, — гӯён дорухатро дароз кард.
Дар он арбидолу азитромитсин навишта шуда буд. Буд дар дорухона чунин даво. Мӯйсафеду кампир хурсандона доруро гирифтанду дуои ҷонаш карда, бошитоб рафтанд.
— Он пиронсолон ҳоло чӣ аҳвол дошта бошанд? Оё писарашон шифо ёфт? Чаро он шаб суроға ё рақами телефонашонро напурсидам? – бо ёдовар шудан аз ин воқеа суҳбатамон бо Нигина Расулова, мудири шуъбаи дорухонаи №5-и шаҳри Душанбе оғоз гардид.
Ӯ дар муддати беш аз 30 соли фаъолият дар дорухона шоҳиди даҳҳо чунин воқеаҳо шудааст, ки аксарияташ бо сипосу дуои корафтодагон нисбаташ хатм меёфт. Нигина мегӯяд, ки аз бемории ҷигарбанд падару модар чунон ба изтироб меафтанд, ки дунё ба назарашон наменамояд ва тайёранд барояш доруи даркориро аз зери замин пайдо кунанд.
Нигина Расулова дар хонаводаи зиёӣ ба дунё омада, ба воя расидааст. Модараш, ки омӯзгор буд, чунин хислатҳои накӯ, мисли инсондӯстиву нексириштиро дар қалби фарзандон парваридааст. Падараш, геологи шинохта, дар тарбияи онҳо сахтгир буду серталаб. Бале, муҳити созгори хонавода буд, ки фарзандон ҳар яке дар зиндагӣ мавқеи арзанда пайдо намуданд.
Ӯ, ки аз давраи мактабӣ рағбати беандоза ба фанҳои химия ва биология дошт, соли 1991 пас аз хатми мактаби миёнаи №1-и ба номи Садриддин Айнии ноҳияи Ашт бо фотеҳаи волидон барои идомаи таҳсил ба шаҳри Душанбе омад. Имтиҳонҳоро муваффақона супурда, донишҷӯи факултаи фармасевтии Донишгоҳи давлатии тиббии Тоҷикистон ба номи Абуалӣ ибни Сино гардид. Замони таҷрибаандӯзӣ дар дорухонаи машҳури №1-и шаҳри Душанбе шавқаш ба пеша бештар афзуд. Ин ҷо Нигинаро ҳам ба дорусозӣ ҷалб мекарданд ва ӯ маҳсули заҳматашро дида, шод мегашт.
— Фаъолияти кориам дар соҳаи фармасевтика аз дорухонаи овозадори №1-и пойтахт оғоз ёфт. Мудири шуъбаи онвақта Нуралӣ Бозоров аз кори мо, гурӯҳи таҷрибаомӯзон қаноатманд шуда, се нафар, аз ҷумла маро ба кор гирифт. Ҳамин тавр, то хатми донишгоҳ мо аллакай ҷойи тайёри кор доштем, — бо табассум ёд меорад Нигинабону.
Имрӯз низ Нигина Расулова, ки беш аз 10 сол боз дар дорухонаи №5-и шаҳри Душанбе фаъолият дорад, ба мизоҷону дардмандон ва корафтодагон бо муомилаи хуш хуб хизмат мерасонад. Ӯ мегӯяд, ки омӯзиши нозукиҳои пешаи дӯстдоштааш пас аз итмоми донишгоҳ хотима наёфтааст, баръакс ҳар рӯзаш аз омӯхтани таркиби маҳсулоти дорувориҳои нав оғоз меёбад.
— Ҳамеша дар фикри он ҳастам, ки сари вақт аз доруҳои нав огоҳ шавам, таъиноташонро дар хотир гирам. Бинобар собиқаи калони корӣ доштан, ҳарчи дар ин муддат андӯхтам, ба ҳамкасбони навкору ҷавонам меомӯзонам, чуноне ки дар вақташ ба мо ёд дода буданд, — изҳор медорад Нигина.
— Дорухонаи мо на танҳо ба мизоҷон доруҳои гуногун, атриёт, гиёҳдоруҳо, хӯрокҳои варзишӣ ва молҳои ортопедӣ пешкаш менамояд, инчунин дар тарбияи мутахассисони соҳаи фармасевтӣ саҳгузор мебошад, — бо ифтихор гуфт дар фарҷоми суҳбат Нигина Расулова.
Ҷ. ПАЙМОНА, “Даво”
