Истеъмоли ғизоҳои гуногунрангу гуногунтаъм ба қобилияти ҳаётии организми мо нақши муҳим мебозад. Номгўйи чанд витамин, ки пешкашатон менамоем, дар барқарор сохтани қувват, нигоҳ доштани ҷавониву зебоӣ кўмакатон хоҳанд кард.
Рўҳ
Рўҳ (цинк) дар ташаккулёбии лимфоситҳо ва таъсири ҳуҷайраҳои масунияти бадан иштирок мекунад. Ҳангоми норасоии рўҳ масъунияти бадан паст мешавад. Рўҳ дар кунҷиту чормағз хеле зиёд аст.
Кислотаи фолиевӣ – витамини В6
Ин витамин ба заноне лозим аст, ки мехоҳанд фарзанди солим ба дунё оранд. Он барои дуруст шаклгирии системаи асаби ҷанин месоидат намуда, хатари тавлиди тифлро бо ноқисиҳои инкишофӣ пешгирӣ мекунад. Ғайр аз ин, дучоршавиро ба саратони тухмдонҳо ва ғадудҳои ширӣ пешгирӣ карда метавонад. Витамини В6 дар барги сабзи сабзавот, зардии тухм, моҳӣ, лўбиёгиҳо, банан, чормағз, картошка, ҷигар ва гўшт зиёд аст.
Калсий
Норасоии калсий дар организм ба борикшавию камқувватшавии устухонҳо оварда мерасонад. Ин ноқисӣ ҳангоми афтодан зарбу лат хўрдан ва шикастани устухон оварда мерасонад. Бе калсий дил, рагҳо, мушакҳо ва системаи асаб наметавонанд ҳамаҷиҳата инкишоф ёбанд.
Ин элемент дар гардиши хун ва баэътидоловарии кори ғадудҳои эндокринӣ фаъолона иштирок карда, қодир аст аз организм намак, радионуклидҳо ва дигар металҳоро барорад. Бинобар таъсири антиоксиданти калсий ба вуҷуд омадани варамҳо дар баъзе узвҳо пешгирӣ мегардад.
Калсии беҳтаринро аз панири швейтсарӣ, креветкаҳо, карам ва маҳсулоти ширӣ гирифта метавонед.
Магний
Бояд ҷисми зан аз магний шодоб бошад. Дар сурати норасоии он мубодилаи моддаҳо вайрон мегардад, даври ҳайзбинӣ халалпазир ва қобилияти ҳомиладоршавӣ паст мешавад. Зан тез хаста мегардад ва дар назар ҳамеша хоболуд менамояд. Вақте ки ҷисм аз магний танқисӣ мекашад, рутубат дар ҷисм кам мешавад ва ин ба ҳолати пўст бетаъсир намемонад.
Пўст пурожанг гашта, шахшўлӣ пайдо мекунад. Зиёда аз ин, магний кори майнаи сарро беҳтар гардонида, аз организм зиёдатиҳои холестерини «бад»-ро мебарорад. Чормағз, гречка, ҷав ва зайтун аз магний боянд.
Витамини С – кислотаи аскорбин
Аз ин витамин ҳолати дандонҳову пўст, ташаккулёбии ҳуҷайраҳои хун, кори рўдаҳо ва системаи масъуният вабастагии калон дорад. Вақте ки организм аз он танқисӣ мекашад, мо хастаҳол ва қаҳролуд мешавем. Пўстамон хушк шуда, мўйи сарамон бошиддат мерезад. Витамини С дар меваҳои ситрусӣ, брокколи, киви, смородинаи сиёҳ зиёд аст.
Витамини Е
Токоферолро витамини зебоӣ меноманд. Он аз антиоксидантҳои пурқувват иборат аст. Витамини Е ҳуҷайраҳои мембранаро қувват медиҳад, ки аз он ҳолати мўю пўст беҳ мегардад. Ин витамин дар равғани растанӣ, гандум, барги сабзавот, донаи офтобпараст, чормағзу лўбиёгиҳо зиёд аст.
Оҳан
Оҳан барои баланд намудани гемоглобин – сафедае, ки кислородро ба ҳар ҳуҷайраи организм мерасонад, зарур мебошад. Ҳангоми норасоии оҳан камхунӣ ба амал меояд.
Барои организми худро аз ин витамин бой намудан бештар ҷигар, гўшти сурх, гречка хўред.
Омодасоз Ҳусния Ҳафизова
