Чуноне як тасодуф метавонад масири зиндагиро куллан тағйир диҳад, вохўрӣ бо Пешвои миллат муҳтарам Эмомалӣ Раҳмон роҳи ман ва 11 ҷавони шаҳри Исфараро ба шаҳри Душанбе, ба шаҳри орзуву ормонҳо боз намуд, — мегўяд Бежани Суғдиён ва он рўзҳои фараҳбахшу хотирмонро ба ёд меорад.
— Соли 2017 Сарвари давлат бо сафари корӣ ба шаҳри Исфара ташриф оварданд ва бо мардуми сарбаланди он суҳбати самимӣ анҷом доданд. Маро низ дар қатори баромадкунандаҳо дидори Ҷаноби олӣ насиб кард. Ҳангоми дар осоишгоҳи “Зумрад” будан ба роҳбарияти он супориш доданд, ки бахшида ба “Соли ҷавонон” ман ва 11 ҷавони дигарро барои идомаи таҳсил ба Донишгоҳи давлатии тиббии Тоҷикистон ба номи Абӯалӣ Ибни Сино фиристанд. Ҳамин тавр, бо ҳидояту дастгирияшон Донишгоҳи давлатии тиббии Тоҷикистон ба номи Абӯалӣ ибни Синоро соли 2023 сарбаландона хатм намудам.
Бежан дар оилаи олим, шоир ва рӯзноманигор зода шудааст. Аз хурдӣ ба эҷод шавқу рағбати беандоза дошт ва ҳамин аст, ки замони таҳсил дар литсейи рақами 3-и шаҳри Исфара узви фаъоли маҳфили “Суханварон”-и назди қасри фарҳанг буд. Борҳо дар озмуну сабқатҳои эҷодӣ ширкат варзида, шаҳди пирӯзӣ низ чашидааст. Аз ҷумла, ҳанӯз соли 2014 дар озмуни вилоятии “Ҷило” мақоми аввалро касб карда, соли 2016 дар машварати ҷумҳуриявии “Адибони ҷавон”-и назди Иттифоқи нависандагони Тоҷикистон аз шумори пешсафон буд. Ба худ тахаллуси Суғдиёнро интихоб карда, бо ин ном дар рӯзномаву маҷаллаҳои давр маҳсули қаламашро тез-тез мунташир мекард.
Имрӯз ӯ дар Донишгоҳи давлатии тиббии Тоҷикистон ба номиАбӯалӣ Ибни Сино ба ҳайси мудири шуъбаи кор бо ҷавонон фаъолият менамояд. Ҳамзамон, дар ординатураи Донишкадаи таҳсилоти баъди-дипломии кормандони соҳаи тандурустӣ, бо ихтисоси “асабшинос” таҳсилро идома медиҳад.
— Замони таҳсил дар донишгоҳ, дар телевизиони “Сафина” ровии барномаи “Субҳ ба хайр Тоҷикистон” будам. Маҳз ҳамин таҷриба имкон дод, ки соли 2020 узви Иттифоқи журналистони Тоҷикистон шавам. Ҳоло дар баробари кору таҳсил, ба таҳияи маҷмӯаи ашъорам таҳти унвони “Сафинаи умед” банд ҳастам ва боварӣ дорам, ки ин туҳфаи хоксоронаи банда ба ҷашни 35-солагии соҳибистиқлолии кишвари азизам хоҳад шуд, — иброз медорад ҳамсуҳбатам Бежани Суғдиён.
Суҳбат кардан бо ҷавоне, ки ду соҳаро бо ҳам тавъам кардааст, аҷиб аст. Вақте ӯ дар бораи нозукиҳои соҳаи тиб шево ҳарф мезанад, гумон мекунӣ, ки дар риштаи суханшиносӣ таҳсил карда бошад.
— Барои табиби асабшинос муҳим аст, ки асаби мустаҳкам дош-та, сабур бошаду таҳаммулпазир. Дар ҳама ҳолат тамкинро нигоҳ дорад ва беморро низ таскин дода тавонад. Чӣ хеле мегӯянд, табиб бояд ҳадди ақал панҷоҳ дарсад бемори худро бо сухан табобат карда тавонад. Ман низ кӯшиш мекунам, ки дар навбати аввал на бо дору, балки бо сухан муолиҷа намоям. Ба ӯ боварӣ бахшам, ки ҳатман шифо меёбад, -мегӯяд Бежани Суғдиён.
Мусоҳиби ҷавонам ният до-рад, ки пас аз хатми ординатура ба осоишгоҳи “Зумрад” баргашта, дар хизмати мардум бошад.
Амони МУҲАММАД, “Даво”
