Тибқи омори Созмони умумиҷаҳонии тандурустӣ ҳамасола сигоркашӣ боиси марги 7 млн одам мешавад. Ин аст, ки аз соли 1987 ҳамасола дар рӯзи охирини моҳи май Рӯзи ҷаҳонии бидуни тамоку баргузор мегардад. Табибон аз таъсири марговари тамоку ба саломатӣ 5 далел меоранд, ки агар шумо сигоркаш бошед, шояд аз даҳшати он ин одати бадро партоед.
ДАЛЕЛИ ЯКУМ. Бино ба маълумоти СУТ, сигоркашӣ сабаби 85 дарсади марг аз саратони шуш, нойи нафас, 26 дарсади сил, 24 дарсади сирояти роҳҳои поёнии нафас,16 дарсади бемории ишемии дил мешавад.
ДАЛЕЛИ ДУЮМ. Бо сигоркашӣ ба организми вай дуди тамоку медарояд, ки дар таркибаш зиёда аз 400 моддаи гуногуни кимиёии кансерогенӣ дорад. Кансерогенҳо ва пайвастаҳои фулузҳои вазнин (никел, хром, кадмий, бензол) ба маводи ирсии ҳуҷайраҳо роҳ меёбанд, ки дар натиҷа омосҳои саратонӣ авҷ мегиранд.
ДАЛЕЛИ СЕЮМ. Як пачка сигор кашидани одам ин беш аз 320 мл оксиди карбон аст, ки гемоглобини хунро 5-7 дарсад кам мекунаду тамоми организмро дучори камбуди оксиген. Оксиди карбонро назар ба оксиген гемоглобин 200 маротиба тезтар ҳазм мекунад ва баъдан босуръат бо ҳуҷайраҳои хун интиқол меёбад. Ин токсин, ки ҳуҷайраҳои асабро хароб мекунад, боиси заъфи хотира ва дарди сар, ҳамчунин авҷгирии ихтилоҷи дил ва сактаи он мешавад.
ДАЛЕЛИ ЧОРУМ. Собит шуда, ки ба саратон ва сили шуш сигоркашҳо назар ба одамоне, ки сигор намекашанд, 11-13 маротиба бештар гирифтор мегарданд. Пайдоиши саратони лабҳою забон, ҳалқ ва меъда низ аз тамокуст. 93 дарсади саратони гулӯ аз сигоркашӣ мебошад.
ДАЛЕЛИ ПАНҶУМ. Тамоку қувваи боҳро хеле заиф месозад: хатари импинати мард 2,7-2,8 маротиба боло меравад. Никотин имкони тифли солим таваллуд кардани занро ниҳоят кам мекунад.Чунин аст, 5 далел. Қазовату хулоса аз шумост.
Таҳияи Муҳаммадраҷаб БЕРДИЁРОВ
