Аслан, таҳия, нашр ва дастраси ниёзмандон қарор додани як маҷаллаи тиббии оммавӣ дар ҳамин шабу руз кори саҳл нест. Ҳайати эҷодии маҷаллаи “Даво”, ки 15 сол дар хидмати мардуми азизамон, дар хидмати кормандони соҳаи тандурустӣ, дар муаррифӣ намудани масъалаҳои мубрамтарини соҳаи тандурустии кишвар дасту панҷа нарм мекунанд, барояшон ин сана мубораку фархунда бод!
Дар оғози соли 2026 нашр гардидани шумораи идонаи маҷаллаи тиббӣ-оммавии “Даво” фоли нек аст. Барои якояки шаҳрвандони кишвари мо ин сол соли муборак аст, чунки 35-умин солгарди Истиқлолияти давлатиро таҷлил мекунем. Бинобар ҳамин ин сана натанҳо барои аҳли эҷоди он, балки баҳри кулли кормандони тиб, ҳамчунин хонандагони сершумораш фархунда мебошад. Зеро дар ин муддати кутоҳ “Даво” тавонистааст ба оинаи муҷаллои кору рӯзгор, фаъолияти муваффақона ва дастовардҳои табибону олимону мутахассисони соҳа, пешрафти тибби ватанӣ, муассисаҳои тандурустӣ ва фармасевтӣ табдил ёбад. Дар ҳар шуморааш доир ба умдатарин масоили профилактика ва ташхису табобат, корбасти технологияҳои
муосир, тарғиби тарзи ҳаёти солим маводи илмию амалӣ бо забони фасеҳу фаҳмо нашр мекарду мекунад. Ин шаҳодати касбияти баланди кормандони маҷалла аст, ки суханро ба даво табдил дода, тавассути ҳамкории судманд бо мутахассисон ҳам ба кормандони соҳа ва ҳам аҳли ҷомеа иттилооти дархурашонро манзур месозанд.
Зимнан, дар Маркази тиббии “НАСЛ”, ки солиёни зиёд дар хизмати мардуми диёр буда, садҳо оиларо, ки дар орзуи модару падар шудан буданд, соҳиби фарзанд намуд, ният дорем, сомона ва маҷаллаи электронии “Тоҷмеднюс”- Ташкилоти ҷамъиятии “Бунёди рушди тибби хусусии Тоҷикистон”-ро, ки
бунёдгузораш ҳастам, фаъол созем.
Бовар дорам, ки тавассути ҳамкорӣ бо маҷаллаи “Даво” фазои иттилоотии тиббиро тақвият бидиҳем ва дар таҳкими маърифати тиббии аҳолии кишвар нақше дошта бошем. Бо истифода аз фурсати муносиб аҳли қалами маҷаллаи шӯҳратёри “Даво”-ро бо 15-умин солгарди фархунда самимона муборакбод мегӯям. Саломату хушрӯзгор бошеду қаламатон сабзу каломатон давобахши мардуми мо бошад!
Шамсиддин Қурбонов,
муассиси ҶДММ “Маркази тиббии НАСЛ”
