Аз 8-ум то 11-уми феврали соли ҷорӣ дар Давлати Кувайт 16-умин Намоишгоҳи байналмилалии ихтироъкорон дар Ховари Миёна баргузор гардид, ки дар он ҳашт нафар олимону профессорон ва ихтироъкорони тоҷик аз донишгоҳҳо ва макотиби олии Ҷумҳурии Тоҷикистон ширкат варзиданд.
Боиси ифтихор аст, ки намояндагони соҳаи тандурустии мамлакат низ дар ин чорабинии сатҳи баланд ширкат варзида, сазворҳои ҷойҳои ифтихорӣ гаштанд.
Мунира Роибова, мудири Маркази малакаҳои таҷрибаомузии Коллеҷи тиббии шаҳри Бохтар ва ҳамзамон аспиранти Донишгоҳи давлатии тиббии Тоҷикистон ба номи Абуалӣ ибни Сино бо пешниҳоди лоиҳаи илмии хеш дар самти кимиёи фармасевтӣ ва таҳияи пайвастагиҳои нави доруворӣ сазовори ҷойи дуюм ва медали нуқра гашт.
Бояд гуфт, ки мавзуи таҳқиқоти илмии номбурда ба синтези биологии пайвастагиҳои кобалт бо дибазол бахшида шудааст. Ин пажуҳиш дар заминаи кафедраи химияи фармасевтӣ ва токсикологӣ анҷом дода шуда, ба таҳияи пайвастагиҳои нави доруворӣ ва омӯзиши таъсири биологии онҳо равона гардидааст. Ба гуфтаи мутахассисон, чунин корҳои илмӣ метавонанд дар оянда барои рушди соҳаи дорусозӣ ва эҷоди воситаҳои муосири табобатӣ заминаи устувор фароҳам оваранд.
Қобили зикр аст, ки дар намоишгоҳи мазкур ихтироъкорон ва муҳаққиқон аз 70 кишвари ҷаҳон ширкат варзида, дастовардҳои худро дар соҳаҳои гуногуни илм ва технология муаррифӣ намуданд.
