Бисёриҳо ба ҳал кардани кроссворду сканворд, чайнворд ва ғайра чун як кори беҳуда ва вақтгузаронӣ менигаранд. Ҳол он ки машғулияти мазкур имкони хуби мустаҳкамкунии хотира аст.
Чаро дар айёми пиронсолӣ хотираи мо заиф мешавад? Ба гуфтаи мутахассисон дар натиҷаи беморӣ ва ё стресси сахт раванди таъмини мағзи сар бо хун бад шуда, робитаҳои нейронӣ вайрон мешаванд. Бинобар ин, дар хотир нигоҳ доштани иттилоот мушкил мегардад. Хотира ду навъ мешавад:
- Актуалӣ (фаврӣ), ки дар он маълумот то 40 дақиқа маҳфуз мемонад.
- Дарозмуддат, ки хотира онро дурудароз ҳифз мекунад.
Вақте кас кроссворд ҳал мекунад, майнаи сар ба фаъол шудан водор мегардад. Он аз «хазина»-и худ маълумоти заруриро ҷустуҷў намуда, робитаҳои нейрониро фаъол месозад. Агар хотираро ба як китобхона шабоҳат диҳем, ҳалли кроссворд онро ба тартиб медарорад,чангҳояшро тоза мекунад, варақ мезанад, ҷо ба ҷо мекунад. Дар китобхонае, ки зуд-зуд нигоҳубин мешавад, китобҳо дурудароз ва босифаттар меистанд. Хотираи мо низ чунин аст.
Касоне, ки дар нақлиёт ё дар диван дароз кашида сканворд ҳал мекунанд, ба гумон аст, ки инро махсус барои мустаҳкамсозии хотира анҷом диҳанд. Ҳамту сканвордро дўст медоранду халос . Ҳол он ки бо кадом мақсад ба ин амал даст задан нақши муҳим мебозад. Хотираи мо хеле эмотсионалию ҳассос аст. Агар мо ба майли хотир ба азёд кардани шеъру ҳал кардани сканворд даст занем, иттилоот дар майнаамон беҳтар сабт мешавад. Лекин дар сурати маҷбурӣ ё бо дили нохоҳам ба ин амалҳо даст задан фоидааш ночиз мешавад.
Хотира (ҳофиза)-и инсон маъниро дар хотир мегирад. Хондани хушку холӣ барои азёд кардан кифоя нест. Бояд шахс маънии хондагиашро дарк намояд.
Яке аз роҳҳои осону исботшудаи азёд кардан чунин аст: Аввал бо матни зарурӣ тавассути хондан ё шунидан ошно мешавед. Баъди 40 дақиқа «муҳлати ҳифз»-и иттилоот ба поён мерасад. Аз ин рў, бори дигар онро такрор бояд кард. Бо гузаштани 12 соат боз онро такрор намудан лозим. Ин гуна амал намудан ҷараёни ҳифз (азёд) карданро осон месозад.
С.Аминиён
