Муолиҷаи конъюктивит (сурхшавию обрезии чашм)
— Як қошуқ бобунаи хушкро гирифта, ба як истакон оби ҷӯш андозед. Баъди се соат дам додан оби мазкурро ба чашм чаконед. Ё ин ки пахтаи тоза (аз дорухона гирифташуда) — ро ба давои мазкур тар карда, рӯзе 5 маротиба 15-20 дақиқаӣ ба чашм гузоред.
— Як қошуқча чойи хушкро дар як истакон оби ҷӯш ним соат дам дода, пахтаро ба он тар кунеду 15- 20 дақиқаӣ ба чашм гузоред.
— Як бандча шибит (укроп)- ро реза намуда, шарбаташро бигиред. Пахтаро ба шарбати шибит тар намуда, 15 дақиқа ба чашм гузоред.
— Як қошуқӣ тухми шибит, баргу пояи чилбуғум (полевой хвощ), коснӣ (чачараскул, цикорий) ва решаи кӯфтаи гули хайрӣ (алтей)- ро бо ҳам омехта кунед. Аз он як қошуқ гирифта, ба як истакон оби ҷӯш андозед. Баъди хунук шуданаш якчанд қатраашро ба чашм чаконида, сипас пахтаро ба он тар намуда, ба чашм гузоред.
— Ду қошуқча меваи настаран (хулул, хуч, шиповник)-и кӯфташударо ба як истакон об андохта, то ҷӯш омаданаш гарм кунеду аз болои оташ (плитка) бигиред. Баъди хунук шуданаш бо он чашмро тар намоед.
Ин амалро рӯзе чор маротиба такрор кунед.
Давои шабкӯрӣ (куриная слепота)
— Як қошуқ меваи хушки кӯфташудаи настаранро бо ду истакон об 10 дақиқа ҷӯшонед. Сипас 2-3 соат дам дода, чоряки истакон ё ним истаконӣ рӯзе 3-4 маротиба истеъмол намоед.
— Аз 3 то 5 грамм баргҳои хушки қоти сиёҳ (чёрная смородина) — ро дар як истакон оби ҷӯш 30 дақиқа гарм печонида, рӯзе ним истаконӣ ду бор истеъмол кунед.
— 20 грамм баргу меваи хушки қулфинай (земляника) — ро дар як истакон оби ҷӯш 5-10 дақиқа ҷӯшонед. Сипас 2 соат дам дода, як қошуқӣ рӯзе се маротиба истеъмол кунед.
— 6 грамм решаю барги қоқу (одуванчик) — ро дар як истакон об 10 дақиқа ҷӯшонида, 30 дақиқа дам диҳед. Як қошуқӣ рӯзе се маротиба пеш аз ғизо нӯши ҷон кунед.
— 7 грамм газна (крапива)-и хушкро дар як истакон оби ҷӯш гарм печонида ним соат дам диҳед. Як қошуқ, рӯзе се маротиба истеъмол намоед.
-20 грамм гиёҳи хушки роҳдавак (спорыш) — ро дар як истакон оби ҷӯш андохта, 10- 15 дақиқа дам диҳед. Як қошуқӣ рӯзе 3- 4 маротиба нӯши ҷон кунед.
— Як қошуқ баргу пояи лух (аир болотный) — ро дар як истакон оби ҷӯш андохта, 20-30 дақиқа ҷӯшонед. Як қошуқӣ рӯзе 3 маротиба истеъмол кунед.
— Чор қошуқ решаи майдакардаи гандумаҷириқ (гандумак, пырей ползучий) — ро дар 5 истакон об ҷӯшонед. Аз ин даво як қошуқӣ 4-5 маротиба истеъмол бояд кард.
— Қиёми думи шер (настойка пустырник) — ро 30- 40 қатраӣ рӯзе 2-3 маротиба истеъмол кунед.
— Қиёми лимугиёҳи чинӣ (лимонник китайский) — ро, ки дар дорухонаҳо фаровон аст, 20-30 қатраӣ дар нимаи аввали рӯз истеъмол намоед.
— Шарбати сабр (алоэ) — ро, ки дар дорухонаҳо мавҷуд аст, як қошуқӣ рӯзе 2-3 маротиба 20-30 дақиқа пеш аз ғизо истеъмол намудан нури чашмро афзун мекунад.
Ғизоеҳое, ки биноиро неру мебахшанд
— Истеъмоли ғуҷуммеваҳо, ба монанди қулфинай, қарақот (сиёҳгилаи кабуд, черника), тути хирс (клюква) тақвиятдиҳандаи қувваи биноӣ ба шумор мераванд.
— Истеъмоли доимии сабзӣ, карам, помидор, шалғам ва пиёзи сабз нури чашмро меафзоянд.
— Истеъмоли меваи тару тоза ва ё шарбати ғубайро (рябина), қоти сиёҳ (смородина), ангат (облепиха) ва настаран давои бемориҳои чашманд.
— Аз гиёҳи тару тозаи газна ва қоқу хӯриш (салат) тайёр кардан ва ба шӯлаю мастоба ҳамроҳ кардани онҳо боиси афзоиши нури чашм мешавад.
— Руҳ (цинк) барои пурра ҷабидашавии витаминҳои А ва Е, ки барои қувваи биноӣ заруранд, кумак мерасонад. Элементи мазкур дар кунҷид, чормағз, гӯшти гов, лӯбиёгиҳо, тухм ва чормағзи заминӣ фаровон аст.
— Лютеин барои баланд бардоштани қувваи босира муҳим аст. Гулкарам, испанок (шпинат), помидор, сабзӣ, каду ва тарра (кабачки) аз лютеин бой мебошанд.
— Истеъмоли доимии моҳӣ низ барои тақвияти нури чашм кумак мерасонад.
— Тухми мурғ манбаи бойи лютеин ва руҳ буда, аз витаминҳои С ва Е низ ғанӣ аст.
— Давоми як моҳ наҳорӣ кардан бо сабзаи гандум ба чашм нур мебахшад.
— Субҳ дили бенаҳор 100-150 грамм лаблабу истеъмол кардан низ қувватдиҳандаи биноӣ аст.
— 10 грамм барги хушки зуф (подорожник) — ро дар зарфи сирнок андохта, як истакон оби ҷӯш андозед. Сипас болояшро пӯшонида, дар оби ҷӯш гузошта, 30 дақиқа ҷӯшонед. Баъдан ширгарм намуда, аз дока гузаронед ва даворо ба зарфи шишагин гиред. Сеяки истакон рӯзе се маротиба 10- 15 дақиқа пеш аз ғизо истеъмол намоед.
Таваҷҷуҳ! Чашм яке аз узвҳои нозуктарин ба шумор меравад. Аз ин рӯ, пеш аз истифодаи гиёҳдармонӣ бо табиби чашм (офталмолог) маслиҳат кунед.
Додихудои ҶОМӢ,
табиби мардумӣ,
маҳаллаи Ҳамадонии шаҳри Душанбе
