Ҳамасола аз 24 то 27 апрел бо ташаббуси Бюрои минтақавии аврупоии Созмони ҷаҳонии тандурустӣ (ТУТ) Ҳафтаи аврупоии иммунизатсия (эмгузаронӣ) баргузор мегардад. Ҷумҳурии Тоҷикистон низ ин ташаббусро фаъолона дастгирӣ намуда, ҳамасола аз 24 то 30 апрел чунин чорабиниҳоро дар саросари кишвар роҳандозӣ мекунад. Ин маъракаи муҳими тандурустӣ ба тарғибу ташвиқи иммунопрофилактика ҳамчун яке аз усулҳои самараноки пешгирии бемориҳои сироятӣ равона шудааст. Ҳадафи асосӣ баланд бардоштани сатҳи огоҳии аҳолӣ, бахусус волидайн, оид ба аҳамияти эмгузаронӣ мебошад.
Эмгузаронӣ яке аз роҳҳои боэътимоди ҳифзи саломатии инсон, махсусан кӯдакон ба ҳисоб меравад. Он барои пешгирии як қатор бемориҳои хатарнок, аз ҷумла: фалаҷ (полиомиелит), гепатити В, бемории сил, гулӯзиндонак (дифтерия), кабудсулфа, кузоз, сирояти гемофилии типи b, сирояти ротавирусӣ, сурхча ва гулафшон, пешбинӣ шудааст. Барномаҳои эмгузаронӣ асосан кӯдакони то синни 6-соларо фаро мегиранд, зеро маҳз дар ҳамин давра организм ба муҳофизати бештар ниёз дорад.
Бо вуҷуди дастрасии васеъ ба ваксинаҳо, мушкилоти фарогирии нопурраи эмгузаронӣ то ҳол боқӣ мемонад. Тибқи маълумоти мутахассисон, ҳар сол тақрибан 600 ҳазор кӯдак дар минтақаи аврупоии ТУТ аз эмгузаронии ҳатмӣ маҳрум мемонанд. Дар натиҷа, ҳолатҳое ба қайд гирифта мешаванд, ки кӯдакон аз бемориҳое фавт мекунанд, ки онҳоро ба осонӣ тавассути эмкунӣ пешгирӣ кардан мумкин аст.
Маълумоти оморӣ нишон медиҳад, ки нақши эмгузаронӣ дар ҳифзи ҳаёт ниҳоят бузург аст: ҳамасола тақрибан 6 миллион нафар тавассути эмгузаронӣ аз марг наҷот меёбанд; зиёда аз 7,5 миллион кӯдак аз маъюбшавӣ эмин нигоҳ дошта мешаванд. Ин нишондиҳандаҳо бори дигар собит месозанд, ки ваксина на танҳо воситаи пешгирӣ, балки омили асосии таъмини зиндагии солим мебошад.
Мутахассисони соҳаи тандурустӣ таъкид менамоянд, ки эмгузаронӣ на танҳо масъулияти табибон, балки вазифаи ҳар як волидайн аст. Беэътиноӣ нисбат ба эмкунӣ метавонад на танҳо ба саломатии кӯдак, балки ба амнияти санитарии тамоми ҷомеа таҳдид намояд. Баланд бардоштани маърифати тиббӣ, мубориза бо маълумоти бардурӯғ ва иштироки фаъолонаи аҳолӣ дар барномаҳои эмгузаронӣ омили муҳими пешгирии бемориҳои сироятӣ ба шумор меравад.
Ҳафтаи аврупоии эмгузаронӣ як иқдоми муҳими байналмилалӣ буда, ҷомеаро ба амал, яъне ҳифзи саломатии худ ва фарзандон даъват мекунад. Дар шароити имрӯза, ки бемориҳои сироятӣ метавонанд зуд паҳн шаванд, эмгузаронӣ ҳамчун сипари боэътимоди саломатӣ боқӣ мемонад. Аз ин рӯ, истифодаи саривақтии ваксинаҳо кафили ояндаи солими ҷомеа мебошад.
«Даво»
