Дар Тоҷикистон бори аввал ба як бемори гирифтори Диабети навъи 2 амалиёти ҷарроҳии шунткунонӣ байни меъда ва рӯдаи борик, инчунин пайвандсозии рӯда ба рӯда гузаронида шуд.
Ба иттилои манбаъ, ин ҷарроҳӣ аз ҷониби табибони Маркази ҷумҳуриявии илмии ҷарроҳии дилу рагҳо бо истифода аз таҷҳизоти муосири тиббӣ анҷом дода шудааст.
Гуфта мешавад, бемор марди 57-сола буда, тайи панҷ соли охир аз диабети навъи 2 ранҷ мебурд. Амалиёт бо муваффақият анҷом ёфта, ҳоло вазъи саломатии бемор зери назорати табибон қарор дорад.
Табибон таъкид мекунанд, ки чунин усули ҷарроҳӣ ба беҳтар шудани мубодилаи моддаҳо ва паст шудани сатҳи қанд дар хун мусоидат мекунад.
Ин аввалин таҷрибаи чунин амалиёт дар кишвар буда, қадами муҳим дар самти ҷорӣ намудани усулҳои муосири табобат арзёбӣ мешавад.
