Маҷаллаи тиббӣ-оммавии «Даво» дар давоми фаъолияти худ тавонист чун баранда ё интиқолдиҳандаи неруи даво ба мардум бошад. Хонандагони маҷалла аз мутолиаи маводҳои гуногунмазмуни он на танҳо қувваи маънавӣ мегиранд, балки аз тавсияю машварат ва маслиҳатҳои табибон ва олимони соҳаи тиб ба худ як ҷаҳон маънӣ мегиранд ва ба дарди худ шифо меёбанд.
Чанд соле пештар маҷаллаи «Даво» саҳифаи тиббии равонӣ дошт, ки маводҳояшро ман омода мекардам. Хонандагон ба воситаи маслиҳатҳои равоншинос солимии равонии худро нигоҳ медоштанд. Мақолаҳои илмӣ- оммавии равоншиносон диққати хонандагони хушзеҳни маҷалларо ба андозае ба худ ҷалб карда буданд, ки то ба нашр расидани шумораи навбатии маҷалла бо мо дар тамос шуда, мубодилаи афкор менамуданд.
Дар ҳар шумораи маҷаллаи «Даво» 7 машқи равонии тозаи тоҷикӣ нашр шуда, бо василаи он дарду мушкили равонии мардум бартараф мегардид. Дар бораи хунгирии тоҷикӣ ё ҳиҷома, ки дар қатори табобатҳои тибби халқӣ пазируфта шудааст, аввалин бор маҳз дар ин маҷалла барои хонандагон маълумот дарҷ гардида буд.
Шоҳидам, ки аз дидани маҷаллаи «Даво» чӣ гуна рӯҳи хонанда болида ва аз хондани маводи он хушҳол гардид. Сипос ба кормандони маҷалла, бахусус ба сардабири он Бибихонум Дарвешзода, ки саҳми ӯ дар табъу нашри ин маҷаллаи дӯстдоштании хонандагонаш назаррас аст.
Муборак бошад, мавлудат «Даво»!
Маҳмуд Кабир, табиби равоншиносон,
директори Маркази саломатии шаҳри Ҳисор
