Чаро ҳаво дар ҷангали сӯзанбарг барои мо хеле гуворо ва тару тоза менамояд? Гап на танҳо дар бораи бӯи форами қатрон аст. Ҳақиқат он аст, ки дарахтони сӯзанбарг фитонсидҳоро хориҷ мекунанд ва нафаскашӣ аз чунин ҳаво хеле муфид аст. Дар ин бора дотсенти кафедраи терапияи госпиталии
Институти тибби клиникии Лукоми донишгоҳи Пирогов, номзади илмҳои тиббӣ Евгений Таратухин иттилоъ додааст.
-Далелҳои илмӣ таъсири судманди бӯи сӯзанбаргро ба саломатии инсон боварибахш тасдиқ мекунанд. Ин ба таъсири комплексии моддаҳои ихроҷкардаи дарахтон вобаста аст- шарҳ додааст Таратухин.
Ҳангоми сайругашт дар ҷангал ин пайвастагиҳо ҳангоми нафаскашӣ ба бадан ворид мешаванд ва кори системаи асабро тағйир медиҳанд. Терпенҳо ба майна ворид мешаванд ва бо ретсепторҳое, ки барои коҳиш додани изтироб ва стресс масъуланд, таъсири оромбахшӣ мерасонанд.
Фитонсидҳо, ки моддаҳои муҳофизатии табиии растаниҳо мебошанд, дар бадани инсон ҳамчун иммуномодуляторҳо кор мекунанд. Онҳо фаъолияти ҳуҷайраҳои масъули вокуниши зидди саратон ва зиддимикробии баданро зиёд мекунанд.
Мувофиқи тадқиқотҳо, дар буттаҳои арчаи кӯҳна консентратсияи алфа-пинен баландтар аст. Ин таркиб барои системаи нафаскашӣ муфид аст, зеро он бронхҳоро васеъ мекунад.
Ҷангалҳои ҷавони санавбар аз бета -пинен бой мебошанд, ки ба системаи марказии асаб таъсири бештар мерасонанд ва ба истироҳат ва рафъи изтироб мусоидат мекунанд.
Барои ба даст овардани фоидаи бештар сайругашт дар ҷангал муҳим аст, ки дар он якчанд омилҳои муфид якҷоя карда мешаванд — фаъолияти ҷисмонӣ, оромии равонӣ ва нафаскашӣ аз моддаҳои биоактивӣ. Аз ин рӯ, барои ароматерапияи мақсаднок ба сайри ҷангал равед.
С. АМИНИЁН
