Понздаҳ сол дар мизони таърих шояд фосилаи кӯтоҳ намояд, аммо барои як нашрияи касбӣ ба мисли маҷаллаи тиббӣ-оммавии «Даво», ки мақсаду маромаш баланд бардоштани маърифати тиббии мардум, таблиғи пешгирии бемориҳо, тарғиби тарзи ҳаёти солим, инъикоси масоили умдаи тиб, дастовардҳои табибону олимони соҳа мебошад, давраи ташаккул ё чуноне мегӯянд, “қомат рост карданаш” гардид.
Саломатӣ арзишест, ки бе он ҳеҷ пешрафт, ҳеҷ ормон ва ҳеҷ саодат маънои комил пайдо намекунад. «Даво» бо сухани санҷида, тафаккури илмӣ ва мавқеи иҷтимоии худ ин ҳама сол талош варзид, то ин ҳақиқатро ба дилу шуури хонанда расонад: табобат танҳо дору нест, ҳамчунин маърифат ва масъулияти ҳар фард нисбат ба cаломатии худ ва ҷомеа мебошад.
Мавриди зикр аcт, ки маҷаллаи «Даво» дар ин муддат тавонист, воқеан, ба як манбаи боэътимоди донишҳои тиббӣ ва маслиҳатҳои муфиди беҳдоштӣ табдил ёфта, дар баланд бардоштани сатҳи огоҳии мардум ҷиҳати пешгирии бемориҳо, ташаккули тарзи ҳаёти солим ва тарғиби дастовардҳои илми тиб нақши бориз гузорад. Дар саҳифаҳои маҷалла мақолаҳои мутахассисон, маслиҳатҳои табибон, маводи омӯзишӣ оид ба беҳдошт, аҳамияти иммунизатсия, пешгирӣ ва табобати бемориҳои маъмули диабети қанд, фишорбаландӣ, бемориҳои сироятӣ, ҳифзи сиҳатии кӯдакон ва модарон ва ғайра интишор меёбанд. Дар замони мо, ки ҷаҳон бо чолишҳои бузурги беҳдоштӣ рӯ ба рӯ аст, чунин нашрияҳо на танҳо воситаи иттилоърасонӣ, балки василаи бедории маънавӣ ва масъулияти иҷтимоӣ мебошанд.
Аз номи Вазорати тандурустӣ ва ҳифзи иҷтимоии аҳолӣ аҳли эҷоди маҷаллаи “Даво”, муаллифон, табибон, коршиносон ва ҳамаи онҳоеро, ки дар нашр ва рушди маҷалла саҳм мегиранд, бо ин санаи фархунда муборакбод мегӯям. Итминон дорам, ки «Даво» минбаъд низ бо сифати баланд ва мӯҳтавои судманди матолибаш дар татбиқи сиёсати давлатӣ дар соҳаи ҳифзи саломатии миллат саҳми арзанда хоҳад гирифт.
Ба ҳамаи шумо саломатии бардавом, нерӯи тоза, илҳоми эҷодӣ ва дастовардҳои нав ба нав орзу менамоям. Бигзор 15-солагӣ оғози марҳилаи нави равнақу ривоҷи “Даво” гардад!
Ҷамолиддин Абдуллозода,
вазири тандурустӣ ва ҳифзи иҷтимоии аҳолии Ҷумҳурии Тоҷикистон
