– Холаҷон, нусхаи шиносномаатонро ақаллан ба мо пешниҳод намоед, то мо доруҳои лозимаи беморатонро ба шумо дастрас кунем. – хоҳиш мекард Икром аз зани тахминан 60-солаи корафтода.
Хола бошад, ҷузвдончаи дасташро тагу рў карда, шиносномаашро меҷуст. Аммо Икром пурсаброна то ёфтани шиноснома интизор шуду баъд аз гирифтани он доруи даркориро ба зан дод. Дар шароити имрўза на ҳар дорухона ба корафтодагон дору ба қарз медиҳад ва гиламанд шудан аз доруфурўшон ҳам кори дуруст нест. Зеро доруфурўшон ҳам бояд бо маблағи гирифтаашон боз дору харанд.
Икром Ғуломов зодаи шаҳри Кўлоб, хатмкардаи МТМУ рақами 4 ва хатмкардаи факултаи фармасевтии Коллеҷи тиббии шаҳри Кўлоб аст .
-Ман соли 2002 ба факултаи фарматсевтии КТК дохил шуда, соли 2004 онро бомуваффақият хатм кардам. Зимни таҳсил таҷрибаомўзиамро дар дорухонаҳои ҶДММ «Шайх Сино» мегузарондам. Аз амакам, шодравон Абдуҷаббор нозукиҳои ин касбро омўхта, чизҳои нафаҳмидаамро мепурсидам. Дар таҷриба ва кори фармасевтӣ амакамро устоди худ меҳисобам. Дар омўзишгоҳи тиббӣ бошад, устоди гиромиамон Назирмад Раҷабов тарзи тайёр кардани дору ва асосҳои назариявии фармакологиро ба мо меомўзонданд. Аз сабаби дар муҳити кормандони соҳаи фармасевтӣ ба камол расидан, то ба коллеҷ дохил шудан бештари кору бори фармасевтиро ёд гирифта будам. Ба амакаму бародарон ва аҳли оила кумак мекардам.Дар оилаи мо 6 нафар дорусозон ҳастанд,– мегўяд, Икром Ғуломов, мудири филиали дорухонаи ҶДММ «Шайх Сино», шаҳри Кўлоб.
ҶДММ «Шайх Сино» шаш дорухона дорад ,ки ҳама дар ҳудуди шаҳри Кўлоб фаъолият мекунанд. Филиалҳои дорухонаҳои ҶДММ «Шайх Сино» дар назди Беморхонаи вилоятӣ, Беморхонаи вилоятии касалиҳои дил, Беморхонаи касалиҳои қанд ва назди бозори марказӣ фаъолият доранд. Дафтари асосии кории ҶДММ «Шайх Сино» дар назди бозори Саховати шаҳри Кўлоб мебошад.
Ҳоҷӣ Икром мегўяд, дар ҷое, ки кор аст, ҳамкорӣ аст, маслиҳату роҳбаладӣ аст. “Мо бо намояндагони хадамоти тандурустии минтақа ҳамеша дар ҳамкорӣ буда, аз онҳо маслиҳат мегирем ва фаъолияти худро дар доираи қонунҳои муайянкарда амалӣ менамоем. Доруҳо ҳамеша тибқи меъёрҳои лозима нигоҳдорӣ шуда, сари вақт рўихати доруҳои муҳлаташон тамом мешударо тартиб дода, онро аз муомилот мегирем. Доруҳои мо асосан истеҳсоли давлатҳои Россия, Олмону Ҳиндустон, Тоҷикистон ва дигар давлатҳои Аврупо мебошанд” мегӯяд Икром.
Агар доруе дар дилхоҳ дорухонаи шаҳр ва ё минтақаи Кўлоб барои муштариён дастрас нашуд, муштарии ҳоҷатманд дарҳол ба “Шайх Сино” муроҷиат мекунад, зеро имконияти дарёфти доруҳои камёб дар он ҷо бештар аст.Инро аксари муштариён медонанд .Ба гуфтаи Ҳоҷӣ Икром, онҳо имконияти дарҳол ҳал кардани мушкилоти муштариёнро доранд. Доруи кам- ёбро аз шаҳри Душанбе ва дигар минтақаҳо барои муштариёни худ ҳатман дарёб мекунанд ва ҳоҷати онҳоро мебароранд..
-Шумораи дорухонаҳо дар тўли 16 соли фаъолияти ҶДММ чанд карат зиёд шуданд, аммо муносибат бо муштарӣ, дуруст сарфаҳм рафтани дорухату дуруст онро истифода кардан ва хизмати шоиста намудан ба мардум аз беҳтарин хислатҳои кормандони соҳаи фармасевтии ин даргоҳ мебошад. Зеро онҳо медонанд,ки ба дорухона, ба назди дорусоз одами бе мушкилот намеояд, Агар худи ў касал нест, пас нафари наздики ў касал аст. Аз ин рў муомилаи хуб бо муштарӣ аз ҳама воло аст, то ўро дилшикастатар нагардонӣ. “ Мо зиёд қарз медиҳем ва худ шоҳиди ҳол шудед, ки чунин ҳолатҳо хеле зиёданд” – мегӯяд Икром Ғуломов ва умедвор аст ки рўзе муштарӣ ҳам қарзу ҳам арзи сипоси худро ба “Шайх Сино” ва дорусозони инсондӯсти он мерасонад.
ҶДММ «Шайх Сино» бо ширкати «Дўстифарм» ҳамкорӣ дорад ва онҳо мудом дорухонаҳои ин ҷамъиятро бо дору таъмин мекунанд.
“Шайх Сино” инчунин дар бораи ояндаи ҷамъият андеша мекунад. Аз ин рӯ, аллакай дар муддати фаъолияти худ Икром Ғуломов на камтар аз 30 шогирд тайёр кардааст, ки имрўз мисли ў мушкили корафтодагонро осон мекунанд.
Билоли Шамс, шаҳри Кўлоб
