Сирри махфӣ нест, ки дар тирамоҳ сайругашти зери борон пӯсти рӯйро намнок ва рангашро беҳтар мекунад. Лекин чун ҳар рӯз борон намеборад, барои ниқобҳо дар фасли заррин метавон аз мева, сабзавот ва гиёҳҳо истифода бурд. Фақат эҳтиёт кунед, ки онҳо аллергия наангезанд. Ҳамчунин фаромуш насозед, ки пеш аз ниқобгузорӣ нахустин шарт тоза кардани пӯст аст. Акнун чанд тавсия, ки истифодаи онҳо чеҳраю пӯстатонро таровати хоса мебахшанд.
НИҚОБИ ПОКСОЗ АЗ АВОКАДО
Лаҳми авокадоро бо сафедии як тухм ва як қошуқча шарбати лиму омехта намоед. Ба муддати 10 дақиқа ба рӯятон гузоред. Сипас бо оби гарм шуста, креми намсоз молед.
НИҚОБИ ЭҲЁӢ АЗ КАРТОШКА
Картошкаеро ҷӯшонда лат кунед ва як қошуқ қаймоқу як қошуқча равғани зайтун андозед. Ин хамираро 20 дақиқа дар чеҳраатон нигоҳ дошта, баъд бо оби гарм шӯед.
НИҚОБ АЗ КАЛИНА БАРОИ ПЕШГИРИИ АКНЭ (РИХИНАК)
Рӯймолчаро дар шарбати калина тар карда, ба рӯятон 20 дақиқа гузоред. Сипас бо оби гарм равонед.
НИҚОБ АЗ САБЗӢ БАРОИ ҲАМА НАМУДИ ПӮСТ
Шарбати як сабзиро бо орди гандум омехта, тунук ба чеҳра молед. Баъди 15-20 дақиқа бо оби гарм шуста, креми шабона молед. Ниқобро танҳо бегоҳ кардан мумкин аст, зеро сабзӣ пӯстро каме доғдор мекунад.
НИҚОБ БАРОИ ПӮСТИ ХУШК
Зардии 1 дона тухм, 1 қошуқчагӣ асалу ҷурғоту шарбати лимӯро ба ҳам омехта истифода баред , хушкии пӯстро рафъ месозад. Баъди шустани ниқоб молидани креми серғизоро аз ёд набароред.
НИҚОБ АЗ ПӮСТИ СЕБ ВА ПОМИДОР
Як пора себ ё помидорро ба рӯи худ 3-5 дақиқа молед, рӯятонро ботароват мекунад. Барои ҳусни бештар баъди ниқоб оби сабзӣ нӯшед. Агар онро бо афшураи себ омезед, боз беҳтар.
Таҳияи Мадинаи ДАВЛАТ
