НИҚОБРО БАЪДИ ДУ СОАТ ИВАЗ КУНЕД
Фасли зимистон ва аввали баҳор имкони гирифторшавӣ ба бемории зуком бештар аст. Бо мақсади паҳн нашудани зуком ба атрофиён беморро зарур аст, ки аз ниқоб истифода барад. Мувофиқи тадқиқот ҳангоми сулфидану атса задани бемор луоби даҳони ў метавонад то 7 метр паҳн шавад. Дар ҳавои хона вируси бактерияҳои гузаранда сироятнокии худро то 5 соат нигоҳ дошта метавонанд. Таҷрибаҳо муайян карданд, ки ниқоби оддии тиббӣ баъди 2 соати атсаю сулфа кардани бемор тар шуда, ба инкубатори ангезандаҳои беморӣ табдил меёбад. Аз ин рў, истифодаи минбаъдаи он зарарнок буда, сиҳатёбии беморро ба таъхир меандозад. Бинобар ин духтурон тавсия медиҳанд, ки ниқобро баъди ҳар 2 соат иваз бояд кард.
Созмони Ҷаҳонии Тандурустӣ тавсия медиҳад, ки зимни хурўҷи бемориҳои шадиди роҳи нафас дар биноҳои истиқоматӣ, ҷойҳои ҷамъиятӣ, бозору мағоза ва ғайра ба даҳону бинӣ гирифтани ниқоб ашхоси солимро аз сироятёбӣ эмин мегардонад.
Хонаеро, ки дар он бемор бистарӣ шудааст, зуд — зуд шамол дода, сачоқу дастрўймол ва зарфҳои истифодабурдаашро бо оби ҷўш шустан лозим аст. Беҳтар аст, ки бемор дар хонаи офтобрас бистарӣ шавад.
36 СОЛИ ТАДҚИҚОТ
Олимони донишгоҳи Гарвард таҳти роҳбарии доктор Карпентер аз соли 1969 то имрўз ба омўзиши таркиби тамоку, фоида ва зарари ин маҳсулот машғуланд. Онҳо зиёда аз ҳафт миллион ҳуҷҷати корхонаҳои машҳури Аврупоро омўхтаанд. Маълум мегардад, ки сигор ба саломатии инсон зарар дошта, бештар ба занон таъсири сахт мерасондааст. Олим дар асоси далелҳои илмии дар рўзномаҳо чопнамуда аз ҳукуматдорон талаб намудааст, ки ба ташвиқоти маҳсулоти тамокуӣ аз тариқи воситаҳои ахбор хотима дода шавад.
ИСПАНОҚ ХОТИРАРО МУСТАҲКАМ МЕКУНАД
Олимони Донишгоҳи Иллинойси Амрико муайян карданд, ки истеъмоли испаноқ (шпинат), гулкарам ва зардии тухм барои маѓзи сар муфиданд. Дар ин маҳсулот антиоксиданти лютеин зиёд аст, ки он барои ҳифзи хотира зарурӣ мебошад. Олимон тахмин мекунанд, ки эҳтимол лютеин сатҳи илтиҳоби маѓзи сарро кам карда, додани сигналро миёни ҳуҷайраҳои асаб тезонад. Қаблан мутахассисони Донишгоҳи Флорида муайян карда буданд, ки лютеин метавонад дегенератсияи молеклавиро пешгирӣ кунад. Аз ин маълум мешавад, ки истеъмоли испаноқ, зардии тухм ва гулкарам барои нури чашм низ муфид будааст. Ҳамчунин лютеин барои ҳифзи таровати пўст кўмак мерасонад.
С. САЙФИДДИН
