Беш аз навад фисади дорухонаҳои ноҳияи Панҷ бо талаботи имрўзаи соҳаи фармасевтӣ сохта шудаанд.
Филиали дорухонаи 36,6 дар ноҳияи Панҷ, ки зери роҳбарии мутахассиси ҷавон Маъмурбек Ҷурақулов фаъолият дорад, диққати ҳар бинандаро ба худ ҷалб мекунад. Он дар назди Беморхонаи марказии ноҳия ҷойгир буда, 24 соат дар хизмати ниёзмандон аст. Дорухона бо тарҳи замонавӣ сохта шуда, бо тамоми таҷҳизоти зарурӣ ҷиҳозонида шудааст.
Мудири дорухона Маъмурбек Ҷўрақулов хатмкардаи шуъбаи фармасевтии Коллеҷи тиббии шаҳри Қўрғонтеппа буда, соли 2011 ба ҳайси мудири дорухонаи номбурда ба кор омадааст.
-Ман касби падарро пеша кардам ва имрўз бо гузашти чанд соли фаъолияти кориам аз роҳи интихобкардаам қаноатмандам. Хурсандам, ки дар интихоби касб иштибоҳе накардаам. Вақте дасти як корафтодаро мегиред ва болидахотирии онро мебинед, он замон дарк мекунед, ки чи касберо интихоб кардаед. Ҳамарўза ба дорухонаи мо даҳҳо нафар корафтодагон муроҷиат менамоянд, ки аксари онҳо бемору ранҷуранд. Бо ҳар нафари онҳо бояд муомилаи хуб дошт, зеро пеш аз ҳама, бояд бо сухани нек онҳоро табобат кунем. Ин аст вазифаи аввалиндараҷаи мо, кормандони соҳаи дорухонадорӣ» — мегўяд ин мутахассиси ҷавон.
Ҳамчунин мо ҳамеша бо табибон дар робита буда, тавсияҳое, ки ба беморон дода мешаванд, мавриди таҳлил қарор медиҳем. Ин ҳамкориҳо, пеш аз ҳама ба хотири дастгирии ниёзмандон ва беморон аст. Саломатии инсон ин ҷавҳари ноёб аст ва мо бояд онро қадр намоем. Вақте як нафар бо боварӣ ба мо муроҷиат менамояд, мо набояд ба ин боварии ў хиёнат кунем, — мегўяд Маъмурбек.
Сайраҳмон Назриев, махсус барои «Даво»
