Шир ва маҳсулоти ширӣ муҳимтарин манбаи энергия, сафеда ва чарбҳо ба шумор мераванд. Дар таркиби шир калсий, магний, селен, рибофлавин (витамини В2), витамини В12 ва витамини В5 фаровон аст. Дар бисёр кишварҳо вобаста ба мавқеи географӣ ва шароити зисти сокинони он меъёри муайяни истеъмоли шир тартиб дода шудааст. Барои кӯдаки 5-сола ҳамарӯза истеъмол кардани 1 истакон (200 мл) шир меъёри шабонарӯзии талаботи ҷисм ба сафедаро 21%, калорияро 8% ва микроэлементҳои заруриро таъмин менамояд.
Солҳои охир олимон дар хусуси вобастагии истеъмоли шир ва фарбеҳӣ ҳар гуна фарзияҳо пешниҳод мекунанд. Фарбеҳӣ ба истеъмоли шир вобастагии мустақим надорад. Фарбеҳшавӣ аз он сабаб пайдо мешавад, ки кас ғизои серкалория истеъмол намуда, кам ҳаракат мекунад. Нӯшидани шири хом метавонад боиси беморӣ шавад.
Аз сабаби дар таркибаш кам будани оҳан ва фолат шири говро ба кӯдакони то яксола тавсия намедиҳанд. Додани шири нопухта ба кӯдакон қатъиян манъ буда, дар баъзе ҳолатҳо метавонад боиси хунравӣ шавад. Барои кӯдакони хурдсол истеъмоли шири буз аз шири гов дида беҳтар аст. Зеро он нисбатан осонҳазм буда, дар таркибаш бештар калий дорад.
Таҳияи С. АМИНИЁН.
