19 май дар шаҳри Женеваи Конфедератсияи Швейтсария вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода дар ҷаласаи пленарии иҷлосияи 79-уми Маҷмаи умумиҷаҳонии тандурустӣ иштирок ва суханронӣ намуд.
Иҷлосияи имсола таҳти унвони “Тағйири шакли тандурустии ҷаҳонӣ: Масъулияти муштарак” баргузор гардида, дар он масъалаҳои муҳими соҳаи тандурустӣ, тағйирёбии иқлим ва рушди устувор баррасӣ шуданд.
Ҷамолиддин Абдуллозода зимни суханронӣ таъкид кард, ки Тоҷикистон мавзуи ҷаласаро пурра дастгирӣ намуда, ҳамбастагии кишварҳоро омили муҳими ҳифзи саломатии ҷомеа медонад. Ба гуфтаи ӯ, имрӯз масъалаҳои тандурустӣ, иқлим ва захираҳои об бо ҳам робитаи мустақим доранд.
Вазир ҳамчунин изҳор дошт, ки Президенти Ҷумҳурии Тоҷикистон Эмомалӣ Раҳмон пайваста ба аҳамияти ҳифзи захираҳои об ва таъсири тағйирёбии иқлим ба саломатии инсон таъкид менамоянд. Ба гуфтаи ӯ, обшавии пиряхҳо ва норасоии об ба амнияти озуқаворӣ ва фаъолияти низоми тандурустӣ, махсусан дар минтақаҳои кӯҳистон, таъсири манфӣ мерасонанд.
Дар ҷараёни суханронӣ инчунин иттилоъ дода шуд, ки аз 25 то 28 майи соли 2026 дар шаҳри Душанбе Конфронси чоруми байналмилалии сатҳи баланд дар доираи Даҳсолаи байналмилалии амал “Об барои рушди устувор” баргузор мегардад.
Ба гуфтаи масъулон, Тоҷикистон айни замон барои беҳтар намудани хизматрасонии тиббӣ дар деҳот ва таҳкими нигоҳубини аввалияи тиббӣ тадбирҳои навро амалӣ намуда истодааст. Ҳамчунин ба ҳифзи саломатии кӯдакон ва пешгирии бемориҳои кӯдакона таваҷҷуҳи махсус зоҳир карда мешавад.
Дар анҷоми суханронӣ Ҷамолиддин Абдуллозода омодагии Тоҷикистонро барои густариши ҳамкорӣ бо Ташкилоти умумиҷаҳонии тандурустӣ ва кишварҳои узв дар самти ислоҳоти соҳаи тандурустӣ ва ҳифзи саломатии аҳолӣ таъкид намуд.
